A voceira socialista destacou a recuperación da normalidade na institución porque “temos un proxecto ben definido, levamos un ritmo de xestión e de execución moi elevado, e traballamos todos os días para sacar adiante unha política de feitos que mellore a vida dos veciños de todos os concellos”.
“Recuperamos a normalidade para a institución, en canto á imaxe e o funcionamento, cunha fórmula que ten tres elementos básicos: temos un proxecto ben definido, que responde ás necesidades e aproveita as potencialidades da provincia de Lugo; levamos un ritmo de xestión e de execución constante e moi elevado; e traballamos, todos os días, para sacar adiante unha política de feitos que mellore a vida dos veciños e veciñas de todos os concellos”. Así explicou o balance dos tres anos de mandato do Goberno provincial –que se cumpren o vindeiro luns- a Voceira socialista do Executivo, Pilar García Porto.
A deputada incidiu en que o Goberno vén desenvolvendo dende o ano 2019 “un proxecto claro” definido polo presidente, José Tomé Roca, que xira en torno a catro liñas de actuación prioritarias: as políticas sociais, que concentran máis dun terzo do Orzamento total da Deputación, “por convencemento, pero tamén porque nos vemos na obriga de suplir a ausencia da Xunta de Galicia en moitos ámbitos, como pode ser o da atención ós nosos maiores”; a cooperación cos concellos, “que é a auténtica razón de ser desta institución, cooperar cos 67 concellos da provincia para que poidan ofrecer máis e mellores servizos ós seus veciños e veciñas; o apoio aos sectores produtivos, “nomeadamente ao sector primario, que é fundamental para a provincia de Lugo, e o turístico, cun tremendo potencial para impulsar o desenvolvemento do noso rural”, e a mobilidade, “un factor esencial para mellorar a vida da xente, fixar poboación, dinamizar a economía e o emprego, e, polo tanto, para facer competitivo un territorio”.
Este proxecto de provincia, “claro, ben definido e argumentado”, sae adiante grazas “ao compromiso e a capacidade do equipo de goberno e, por suposto, contando co gran traballo de todo o persoal da institución, na que temos equipos profesionais cualificados, competentes e comprometidos co servizo público”, subliñou a Voceira socialista.
De feito, recalcou, “ter claras as prioridades permitiunos reaccionar mellor ante situacións adversas como as que provocou a pandemia da Covid-19”. A modo de exemplos, lembrou que, “ao ter en marcha o sistema do Plan Único, foi máis doado poñer a disposición dos concellos recursos económicos para axudarlles a afrontar os gastos extra que supuxo a Covid; o noso modelo de residencias –público, centrado nas persoas e de pequenos centros- foi determinante para que, afortunadamente, a incidencia da enfermidade entre os nosos usuarios e usuarias fose mínima; e, como xa facíamos antes da pandemia, escoitamos e colaboramos cos sectores produtivos para sacar adiante medidas que aliviasen e que lles axudasen a amortiguar o impacto da crise”.
Compromiso do Goberno do Estado coa provincia
Así mesmo, a deputada subliñou que neste tempo “sentimos que o Goberno do Estado volveu a apostar polas políticas sociais que benefician directamente ós lucenses, como foi, entre moitas outras medidas, a vinculación da subida das pensións ao IPC, e que volveu a situar á nosa provincia no mapa das infraestruturas do país, subindo o investimento e desbloqueando proxecto paralizados durante os anos de Rajoy en Madrid”.
Falta de ideas da oposición e castigo da Xunta
Sen embargo, e “lamentablemente”, asegurou a deputada, nestes tres anos de mandato “sufrimos a falta de ideas da oposición nesta institución, e a inacción e o castigo da Xunta á nosa provincia”.
Pilar García Porto afirmou que o PP “carece dun proxecto para a provincia de Lugo” e “fai un seguidismo das directrices da Xunta que o limitou a unha postura pasiva, sumisa e afastada da realidade e das necesidades dos nosos veciños e veciñas”.
Para a oposición, “os recortes de médicos e profesores, os peches de colexios ou o desmantelamento da industria na Mariña, por citar algún exemplo, son situacións ante as que pechan os ollos e calan. Seguen, sen rechistar, o que fai a Xunta de Galicia, que, na súa incapacidade para asumir as súas propias competencias, ten esquecida á provincia de Lugo. Un olvido que alcanza unhas cotas de desprezo e de deslealdade institucional impropias dunha democracia moderna”, argumentou a Voceira.
Sen ir máis lonxe, lembrou, “o ex presidente Feijóo marchou para Madrid sen ter recibido nin unha soa vez ó presidente da Deputación de Lugo. Nin o chamou sequera durante o tempo máis duro da pandemia, e tampouco nos contestou cando puxemos á súa disposición durante a crise sanitaria as nosas residencias de maiores”.
“Está claro”, engadiu, “que a Xunta non ten un proxecto para a provincia de Lugo, nin para o rural, nin para o noso sector agrogandeiro, forestal e do mar, nin para recuperar e atraer industria. Ao revés, xogou cos sentimentos da xente dicindo que iría para A Mariña unha empresa, para logo anunciar a súa instalación noutro punto da provincia”.
“Os lucenses seguimos esperando polas infraestruturas pendentes dunha Xunta que non ten reparos en culpar ao actual Goberno de España dos problemas creados nunha obra construída na etapa do PP, mentres nunca executa os investimentos que, ano tras ano, anuncia a bombo e platillo”, asegurou Pilar García Porto.
“Gobernamos coa forza dos feitos”
A Voceira apuntou que, precisamente, “esta é outra diferencia importante. Algúns pensan que gobernar consiste en facer promesas que logo nunca fan realidade. Nós, na Deputación, gobernamos coa forza dos feitos. Presentamos, sempre, licitacións, adxudicacións, convenios, inicios ou finalizacións de obras, programas de promoción turística, accións de apoio a sectores produtivos, á cultura, ao deporte, á Universidade, melloras en estradas, e catro residencias abertas en tres anos e outras dúas, en poucos meses. Todo iso, non son promesas, son feitos”.
“Os bos gobernantes non son aqueles que máis falan ou que máis fotos sen fan. Son os que máis executan os Orzamentos, os que cumpren cos obxectivos marcados no seu proxecto e os que respectan a palabra dada aos veciños, porque os anuncios non lle cambian a vida á xente. O que lle cambia a vida á xente son os feitos. E iso é o que vai seguir facendo este equipo de goberno: traballar todos os días para converter en feitos e realidades o noso proxecto. Un proxecto que pensamos que é o mellor para esta provincia, para os concellos, para o tecido económico e, en definitiva, para os nosos veciños e veciñas”, asegurou Pilar García Porto.
