Contou coas intervencións políticas de Néstor Rego, María Jesús López e Ada Blanco.
O Bloque Nacionalista Galego na Comarca de Lugo celebrou este domingo 3 de xullo, na localidade de Samos, a súa tradicional Festa da Patria, onde máis de 100 militantes e simpatizantes da organización reuníronse nun xantar de irmandade. Ademais, contou con diversas actuacións de música tradicional.
Este acto lúdico e reivindicativo enmárcase dentro dos diversos actos previos á celebración do 25 de xullo, Día da Patria Galega, que desenvolve a fronte patriótica por todo o País.
O evento deu comezo coa parte política, na que tivo a palabra o deputado do BNG no Congreso dos Deputados, Néstor Rego, a concelleira do BNG en Samos, María Jesús López e pola mocidade do BNG, Galiza Nova, Ada Blanco.
Néstor Rego declarou “somos unha nación, orgullosas e orgullosos de ser un pobo traballador que ten moitísima historia tras de si, pero, sobre todo, que ten moitísimo futuro por gañar”
O deputado no Congreso subliñou tamén que “o BNG traballa para sumar cada día máis, cun único obxectivo: defender os intereses do País para mellorar a vida dos galegos e das galegas”
De igual xeito, Néstor Rego chamou a celebrar o 25 de xullo non só a toda a militancia da formación, senón a todas as persoas que queren que Galiza sexa “dona de seu e tome as súas propias decisións para afrontar o futuro”.
