Lugo colaborará na investigación dos beneficios dos microminerais en pacientes oncolóxicos. A alcaldesa, Lara Méndez, participou hoxe na presentación do convenio de colaboración que a USC asinará con 65 concellos da provincia para apoiar a iniciativa Minerais contra o cancro, entre os que se atopa o municipio lucense.
O obxectivo deste proxecto, baixo o título específico de Intervalos de referencia de microminerais esenciais e tóxicos na poboación da provincia de Lugo, é coñecer o papel dos minerais na incidencia de determinados tumores e valorar o seu uso como complemento nos tratamentos de quimio e radioterapia, para mellorar a calidade de vida e o prognóstico dos pacientes. O proxecto está a cargo dun equipo multidisciplinar integrado por persoal investigador das Facultades de Veterinaria e Ciencias da Universidade de Santiago de Compostela (USC) e o Hospital Universitario Lucus Augusti (HULA) de Lugo.
Este equipo, coordinado pola profesora Dra. Marta López Alonso, investigadora principal do Grupo de Investigación Imeda, e do que forman parte os profesores Marta Miranda Castañón e Víctor Pereira Lestayo, conta cunha larga traxectoria internacional no estudo dos efectos de minerais tóxicos e esenciais sobre a saúde animal, humana e medioambiental.
O convenio asinado establece un marco de colaboración entre os concellos da provincia de Lugo e a USC que permitirá a recollida de mostras de sangue e posterior determinación analítica dos niveis de minerais das persoas que estean interesadas en paricipar no proxecto de investigación, asumindo os concellos os custes derivados da toma de mostras, preparación e análise das mesmas.
