Marina Doutón, concelleira de Cultura, presenta unha nova edición da Feira do Libro de Monforte, que este ano cumpre a súa vixésimo terceira edición, acompañada por Carlos Blanco, secretario da Federación Librarías de Galicia, entidade que, xunto ó concello, organiza esta feira.
A XXIII Feira do Libro de Monforte estará situada na rúa Cardenal e abrirá maña mércores 24 de agosto, pola tarde e poderá visitarse ata o sábado 27. As casetas estarán abertas de 11 a 14 horas e durante a tarde de 19 a 22 horas. Serán catro xornadas de actividades nas que o público asistente poderá gozar de presentacións de libros, actividades infantís e sinaturas das obras por parte dos seus autores.
Na presentación, Doutón salienta que “dende o equipo de Goberno colaboramos con esta festa da literatura porque consideramos que con ela conseguimos achegarlle ós cidadáns unha parte fundamental da nosa cultura e polo tanto, contribuímos á súa divulgación. Ó mesmo tempo, coa Feira do Libro ofrecemos o noso apoio a un sector tan importante como é o editorial.”
Do mesmo xeito, a concelleira de Cultura indica que “dende o Concello imos seguir apostando por este tipo de eventos, xa que a lectura é a mellor forma de aprender de xeito ameno e divertido, tanto para os adultos como para os máis pequenos da casa”.
O representante da Federación Librarías de Galicia agradece a implicación do concello neste certame, do que destaca que “xa se alcanzaran as 23 edicións”. Tamén detalla a participación de tres librarías, unha de Monforte, outra de Sober e outra de Ferrol, así como o stand da Deputación de Lugo.
Do mesmo xeito Carlos Blanco salienta o completo programa de actividades da feira, no que se inclúen 2 actuacións musicais, actividades a cargo de 36 autores e autoras, 8 presentacións para público adulto e 5 para público infantil, e 19 sinaturas de libros.
Marina Doutón remataba a súa intervención convidando “a todo o mundo a que a partir do vindeiro mércores, se achegue ás casetas da Feira do Libro, que estarán coma sempre instaladas nun marco incomparable como é a rúa Cardenal, para adquirir novos libros que de seguro, lles axudarán a descubrir novas historias e novos lugares.”
PROGRAMA
A feira inaugúrase maña mércores 24 ás 19 horas co pregón a cargo da poetisa de Sober, Moncha Prieto, e a actuación da Banda de Gaitas de Monforte. Ese mesmo día Moncha Prieto asinará Alma del barro na caseta da Libraría Agrasar, a partir das 20.00 horas Tamén a esa mesma hora terá lugar a presentación de Neve de agosto, de Nieves Neira, por Chan de Pólvora.
Ás 20.30 horas Antón Lopo presentará Extraordinario, por Chan de Pólvora, e ás 21.00 horas terá lugar a presentación-recital de Simún, de Nuria Vil, por Chan de Pólvora.
Xoves 25 de agosto
12.00 horas – Xosé Luis Vazquez Somoza asinará O Conserxe na caseta da Libraría Agrasar
12.00 horas – Contacontos de Leopoldo, o pequeno monstro, de Estefanía Padullés por Hércules Ediciones
13.00 horas – Estefanía Padullés asinará Que mal día, gato Klops! na caseta da Libraría Agrasar
18.00 horas – Rober Cagiao asinará Saga El guardián de las flores na caseta da Libraría Cortizas
18.00 horas – Moncha Prieto asinará Alma de barro na caseta da Libraría da Proencia
19.00 horas – Contacontos de Peúgo, o calcetín melenudo, de Jessica Rodríguez Piñeiro por Babidi-bu Editorial
19.30 horas – Olga Novo asinará Cráter na caseta da Libraría Agrasar
20.00 horas – Presentación de A vangarda das formas. A obra cerámica de Isaac Díaz Pardo, de Fernando Arribas Arias e Teresa Pena Moreda coeditada pola Deputación Provincial de Lugo.
Venres 26 de agosto
Durante todo o día.- Finy Sesmonde asinará Fluyendo como el agua na caseta da Libraría Cortizas
11.30 horas – Alberto Fernández Boo asinará Hatshepsut, faraón. A transgresión dunha muller empoderada na caseta de Libraría Agrasar
12.30 horas – Raquel Martínez Salgado asinará Metodologías Activas: Propuestas a través de un enfoque lúdico na caseta da Libraría Agrasar
12.30 horas – Contacontos infantil Un universo na túa maleta por Ana Meilán García
18.00 horas – Ramón Sandoval asinará Nas esquinas do frío na caseta da Libraría da Proencia
19.00 horas – Programación Cultural Primavera-Verán-Música Infantil. Vicepresidencia- Área de Cultura da Deputación de Lugo. Actuación de Paco Nogueiras co espectáculo BuleBule por Kalandraka Editora.
19.30 horas – Abraham Pérez asinará O corpo transparente das horas na caseta da Libraría Agrasar
20.30 horas – Pilar Macía asinará Lobo na caseta da libraría Agrasar
20.30 horas – Presentación de 7 herbas máxicas, de Rosalía Bermúdez e Nanda Cabaleiro por Hércules Ediciones
21.30 horas – Rosalía Bermúdez e Nanda Cabaleiro asinan 7 herbas máxicas na caseta da Librería Agrasar
Sábado 27 de agosto
12.00 horas – Alba López Paredes asinará Saga Nándidor: La leyenda de Noa na caseta da libraría Cortizas durante todo o día
12.00 horas – Alberto Canal asinará Carolina na caseta da Libraría Agrasar
12.30 horas – Actuación infantil Fazulas, o ladrón de paraugas por Bandullo Azul
13.00 horas – Eduardo Baamonde asinará Ribeira Sacra en acuarelas na caseta da libraría Agrasar
13.30 horas – Sara Valcárcel asinará O ladrón de paraugas na caseta da Librería Agrasar
18.00 horas – Jorge Vila asinará Murallas, torres y puertas de las fortificaciones monfortinas na caseta da Libraría de Proencia
19.00 horas – Presentación de El sintonizador, de José Luis Ordóñez por Algaida Editorial
19.30 horas – Antía Yáñez asinará Non penses nun elefante rosa na caseta da Librería Agrasar
20.00 horas – Certames galegos de poesía. Coloquio e recital entre Xosé L. Mosquera Camba, autor de A traxedia da arquitectura (Premio Fiz Vergara Vilariño, Ed.Espiral Maior) e Andrea F. Maneiro, autora de Edénicas. (Premio Illas Sisargas, Ed.Caldeirón) moderado por María Casar por Luagrís.
