Vén de aterrar no municipio lucense de Sarria un grupo duns vinte peregrinos procedentes de Francia, que perseguen de novo acadar o final do Camiño na cidade de Compostela.
Por mor da pandemia, a viaxe viuse posposta ata agora, cando estes peregrinos retomaron o camiño dende a localidade leonesa de Foncebadon.
Non é a primeira vez que realizan esta andaina, como tampouco é a primeira vez para Jacinto Fuentes Mesa, fundador da entidade e todo un veterano do Camiño que afirma que xa realizou tódalas rutas xacobeas.
Entre as iniciativas que leva a cabo a Asociación Xacobea de Xaén está a do Inverno Xacobeo, que se centra en charlas e coloquios que percorren colexios e institutos e mergúllanse nas curiosidades da ruta a Santiago. Co fin de poñer en valor a historia do Camiño.
A ASOCIACIÓN
A Asociación Xacobea de Xaén fundouse no ano 2003 coa firme vocación de manter o espírito da tradición cristiá e mariana da peregrinación cara Santiago de Compostela.
Dende o 2003, atenderon non só a peregrinos senón tamén a futuros peregrinos que quixeron coñecer máis detalles sobre O Camiño de Santiago a través dos membros da asociación.
“Unha das nosas prioridades fundamentais é a de informar e dar a coñecer na provincia de Xaén, O Camiño Xacobeo, así como poder facilitar a tódolos peregrinos que o desexen a credencial”, afirman os integrantes da asociación.
“Tamén promovemos o Camiño Mozárabe de Santiago pola Serra Sur de Xaén tras recuperar esta vía de peregrinación que transcorre polos municipios de Xaén capital, Torredelcampo, Jamilena, Martos e Alcaudete”, segundo puidemos coñecer.
