No acto que tivo lugar no concello de Paradela, varias plataformas coma Fraternidade Internacional do Camiño de Santiago de Compostela (FICS) e Camiño Francés Federación (CFF), propoñen que se amplíen ata 300 os quilómetros necesarios para obter a compostelá ou ben que se eliminen directamente.
Estas plataformas reivindican que se eliminen os 100 quilómetros mínimos que precisan os peregrinos para acadar a compostelá xa que segundo indican, o sistema actual provoca a perda de identidade do Camiño. Debería ser unha experiencia que leve intrínsecos os valores da aventura, a hospitalidade e o distanciamento, pero cos requisitos actuais isto vese reducido a un trote de cinco días.
Os cen quilómetros mínimos que agora son necesarios para lograr a compostelá, son algo relativamente recente que deixa fora a concellos como Triacastela, Samos ou Pedrafita. As estatísticas indican que se está a reducir o número de peregrinos.
Os integrantes destas plataformas, poñen de manifesto que é compromiso de todos coidar a ruta xacobea, pero sobre todo, das administracións públicas.
O erro de base, apoiado polo goberno autonómico, é da catedral de Santiago, á que se leva advertindo durante moito tempo de que o que está a facer non responde á historia.
