O Festival Mundial do Ilusionismo Galicia Ilusiona percorre 17 concellos lucenses desde o pasado 3 de agosto ata o 3 de setembro, con outras tantas actuacións de recoñecidos magos e magas. Este chegará este luns, 22 de agosto a Castro Ribeiras de Lea, coa actuación de Patri Zenner ás 20.30 horas na carballeira.
Previamente, a artista estará tamén na praza da Feira do Monte, ás 12.30 horas e ás 18.00 horas estará en Vilalba, na praza da Constitución, nunha actividade incluída dentro do programa das festas.
Da man do Xacobeo 21-22, a Xunta de Galicia leba por toda a provincia distintos espectáculos de maxia de preto, extrema, maxia na rúa, solidaria e unha gran gala, coa presencia de sete dos mellores magos e magas a nivel mundial.
Os dous directores deste festival, os magos galegos Pedro Bugarín e Dani Polo, foron os encargados de deseñar un programa con máis de 220 actuacións en máis de cen concellos galegos.
A gran gala máxica internacional será un dos pratos fortes deste festival, que en Lugo terá lugar o 3 de setembro no auditorio Gustavo Freire e que contará coa presencia de sete dos mellores magos e magas do panorama internacional, encargados de traer ata Lugo actuacións de maxia de preto, escapismo, maxia de gran formato, telequinese, mentalismo, poesía máxica ou ilusionismo infantil.
A gran gala máxica será o único espectáculo deste festival para o que se precise entrada, aínda que o custo é reducido, cun prezo único de 12 euros, para as entradas que xa están á venda en www.galiciailusiona.es.
Ademais de na cidade de Lugo, Galicia Ilusiona levará a maxia ata outros 16 concellos nos que actuarán algúns dos mellores ilusionistas actuais como o Mago Teto, Nacho Samena, Patri Zenner e Roberto Lolo. Todos eles levarán a súa maxia ata Burela, Chantada, Cervo, Castro de Rei, Foz, Cospeito, Guitiriz, Friol, Monforte de Lemos, Sober, Outeiro de Rei, Monterroso, Ribadeo, Sarria, Vilalba e Viveiro.
