O espectáculo audiovisual José Suárez, Suite para unha vida, chega a Barreiros este sábado 17 ás 20.00 horas no centro sociocultural de San Cosme.
Deste modo, o espectáculo creado por Rafa Fernández; guitarrista noiés afincado en Santiago de Compostela, achegará a vida e obra de José Súarez, tal vez o fotógrafo galego máis recoñecido internacionalmente.
Será un concerto de música en directo acompañado de imaxes de José Suárez como peza central dunha performance audiovisual. A proxección das obras de Suárez farase en tres proxectores simultaneamente colocados de forma envolvente ao público que se mergullará nun marco visual cheo de sonoridade.
José Suárez: Suite para unha vida é unha composición de Rafa Fernández na que está acompañado por Bleuenn Le Friec (Arpa), Virxilio da Silva (Guitarra eléctrica), Álex Salgueiro (Teclados) e Iván Torres (Visuais).
