A Deputación de Lugo abrirá mañá, 27 de setembro, o prazo para que as persoas ou entidade interesadas en optar a algún dos 9 hortos urbanos que quedan dispoñibles no Paseo do Río Rato formulen a súa solicitude. Así o recolle o Boletín Oficial da Provincia (BOP) deste luns, onde se especifica toda a documentación que é necesario presentar para formalizar a petición dunha parcela.
O prazo de solicitude é de 10 días hábiles a contar dende mañá martes, polo tanto, rematará o vindeiro 11 de outubro. Os beneficiarios terán dereito a utilizar os hortos de maneira gratuíta durante un período de dous anos. A adxudicación farase a través dun proceso de concorrencia competitiva no que primarán criterios sociais, como estar en situación de desemprego, ser representante dun centro educativo ou traballar para un colectivo social, entre outros.
Os usuarios e usuarias deben ser persoas físicas ou representantes de asociacións e ser veciños do concello de Lugo ou dalgún municipio limítrofe. A asignación individualizada de cada horto por solicitante e unidade familiar realizarase ás 10:00 horas do luns, 16 de xaneiro de 2023, nas dependencias da Deputación de Lugo. Ademais de no BOP, pódese consultar máis información na web da Deputación.
A Deputación de Lugo dispón dun total de 150 hortos neste espazo público que pon ao servizo da cidadanía para o seu uso, cunha actividade de lecer que fomenta o interese pola agricultura ecolóxica, a concienciación no coidado do medio ambiente e, ao mesmo tempo, a realización de actividades ao aire libre e en familia.
Para contribuír a estes obxectivos, a institución provincial ofrece un servizo de dinamización dos hortos urbanos, que asesora aos usuarios e usuarias en temas relacionados coa horticultura ecolóxica e a xestión de recursos, materiais e maquinaria que a Deputación de Lugo pon á súa disposición para o cultivo dos terreos.
