Os traballos que xa deron comezo, centraranse na construción dun novo pilar na ponte de Piñeira no que previamente se realizaron diversos informes técnicos para levar a cabo a súa reposición.
O alcalde de Monforte, José Tomé Roca, deu a coñecer os traballos previstos para levar a cabo a reposición do pilar número 2, logo de que esta estrutura fora pechada ao tráfico e aos peóns a finais do pasado mes de xuño, tras detectarse unha deficiencia en dito pilar.
O pasado mes de xuño, tras detectar o concello deficiencias neste pilar da ponte de Piñeira que podían poñer en perigo aos seus usuarios, o alcalde decidiu decretar o seu peche ao tráfico de peóns e vehículos co obxecto de levar a cabo os estudos pertinentes encamiñados a analizar polo miúdo a deficiencia do pilar, así como revisar o seu estado xeral, para proceder á súa reparación.
“Tras seren executados os correspondentes traballos de enxeñería a cargo da empresa Extraco e do director de obra designado polo Concello, traballos necesarios para determinar a situación do pilar da ponte e para darlle unha solución á deficiencia detectada, nos próximos 5 días levarase a cabo a colocación de micropilotes nunha profundidade de 9 metros para estabilizar o terreo e proceder á construción do novo pilar”, subliña o alcalde.
O rexedor monfortino anunciaba tamén que os traballos estarán rematados na súa totalidade, si as circunstancias do tempo o permiten, aproximadamente a finais do mes de outubro.
Dado que as obras son contratadas por emerxencia, o custe das actuacións estímase segundo os técnicos en 242.000 euros aproximadamente.
”Unha vez estean rematadas as obras de arranxe da ponte de Piñeira, procederemos ao restablecemento do tráfico de vehículos e de persoas, previsiblemente no mes de novembro”, conclúe o alcalde.
