Skip to main content
A Pobra do Brollón

A oitava edición do festival As Cores do Outono chega esta fin de semana a Pobra do Brollón

Por 24 Setembro, 2022Setembro 26th, 2022Sin comentarios

Tres formacións musicais femininas encabezan este ano a programación da oitava edición de As Cores do Outono: Caamaño&Ameixeiras, Leilía e Habelas Hainas.

Este festival que se celebrará hoxe e maña na Pobra do Brollón, conmemora o inicio da estación outonal con propostas ligadas á música de raíz galegas.

A cita xirará arredor de varios concertos no escenario da área recreativa de Samugueiros dende hoxe pola noite a partir das 21.00 horas.

Este ano, o cartel estará encabezado polo dúo Caamaño&Ameixeiras (Premio Martín Códax da Música 2021 na categoría folk), a agrupación Leilía (formación pioneira na música tradicional de Galicia) e a consolidada agrupación Habelas Hainas.

Hoxe, ademais dos tres concertos que se celebran á noite, haberá un vermú poético-musical, e pola tarde, obradoiro de baile tradicional con Montse Rivera de Leilía. Ao longo da tarde-noite, como é costume haberá barra e postos de artesanía e comida.

Maña domingo, como todos os 25 na Pobra do Brollón, hai feira con postos de polbo e Mercado Circular, unha nova iniciativa municipal para apoiar o consumo local e sostible. O mercado celebrarase na área recreativa Samugueiros, onde ao mediodía o público poderá gozar do espectáculo de circo de rúa C’est pas possible da compañía Sempre Arriba.

O acceso a toda a programación de As Cores do Outono é de balde. Pódese consultar máis información e horarios na páxina web (http://www.concellodapobradobrollon.gal/gl) e nas redes sociais do concello da Pobra do Brollón.