O hotel Vila do Val, de Ferreira do Valadouro acolleu os días 14 e 15 deste mes o II Torneo de Bridge, organizado polo Club de Bridge Ciudad de Lugo.
Neste torneo participaron 29 parellas chegadas desde diferentes puntos da xeografía española como Asturias, Cantabria, Castela-León e Galicia, ademais do país veciño Portugal.
Os gañadores foron Germán Vázquez-Pimentel e Pancha Novo. Os segundos clasificados foron Ana García e Marta Nogueira. E o terceiro posto leváronllo Susana Riveiro e Álvaro Sánchez-Monge.
O evento foi organizado polo Club Bridge Cidade de Lugo desde onde sinalaron que “a finalidade é dar a coñecer a comarca da Mariña a través de bridge, así como este xogo que é universal”. Os asistentes aproveitaron a fin de semana para realizar visitas á Torre do Mariscal Pardo de Cela e á Basílica de San Martiño de Mondoñedo.
A directora do hotel Vila do Val, María Hermida, agradeceu aos organizadores que “elixisen por segunda vez o noso hotel para a celebración deste torneo. Esperamos que gozasen do xogo e da súa estancia na Mariña, que se animen a repetir e a visitar esta comarca en calquera época do ano”.
