O concello de Bóveda informa de que a partir de esta semana, terán lugar as reunións entre os titulares das parcelas do polígono agroforestal e a empresa Proyestegal.
A partir de hoxe e os días 4, 6, 7, 10, 11 e 13 de outubro, en horario de 9.00 a 14.00 horas, e os martes 4 e 11 en horario de 16.30 a 18.30 horas, no salón de plenos da Casa do Concello, a empresa Proyestegal realizará os traballos de recollida das declaracións de adhesión das persoas titulares das parcelas do polígono agroforestal.
Aquelas persoas que o precisen tamén poderán ser informadas sobre os procedementos a levar a cabo no desenvolvemento deste proxecto. Máis adiante, faranse tamén reunións para as persoas interesadas que non sexan propietarias.
O proxecto que na actualidade atópase en fase de actuacións previas, porá en valor case 52 hectáreas de terreo no concello de Bóveda. Dividirase nun total de 292 parcelas que corresponderán a 200 propietarios.
Esta iniciativa ponse en marcha en aplicación da Lei de recuperación da terra agraria de Galicia, co fin de recuperar grandes espazos produtivos segundo o tipo de cultivo máis acaído ou de maior tradición en cada zona.
O obxectivo principal é dinamizar o territorio e xerar actividade económica, para facilitar que siga sendo posible vivir no e do rural e para anticiparse aos lumes, evitando que se rexistren e diminuíndo o seus efectos.
Este polígono agroforestal centrarase en potenciar os tres usos do chan (agrario, gandeiro e forestal). A iniciativa pode ser da Administración ou de particulares, requirindo o acordo de propietarios (ou representantes dos dereitos de uso) de cando menos o 70% da superficie do perímetro do proxecto.
