Skip to main content
Samos

Samos acolle a exposición Manuel Rodríguez López 2.0

Por 20 Outubro, 2022Sin comentarios

O concello de Samos acollerá ata o luns 24 de outubro na Casa do Concello a mostra Manuel Rodríguez López 2.0.

Nesta nova edición a exposición sobre a vida e obra do escritor de Paradela contará cun novo deseño gráfico, contidos actualizados e reestruturados e un acceso inmediato a contidos multimedia adicionais a través de códigos QR.

A mostra forma parte do Proxecto Manuel Rodríguez López e conta co apoio do concello de Paradela, a Deputación de Lugo, a Xunta de Galicia (Secretaría Xeral de Política Lingüística) e a Real Academia Galega.

Esta nova exposición foi posta en marcha este ano como parte das celebracións polos 200 anos do concello de Paradela e na súa presentación participaron José Manuel Mato, alcalde de Paradela; Ana Mel, xefa de Coordinación Cultural da Xunta en Lugo e Julio Gallego, alcalde de Samos.

A exposición orixinal percorreu dende 2013 máis de 21.000 quilómetros, pasando por numerosas cidades e vilas galegas, visitou a Casa de Galicia en Madrid, as Universidades de Granada, Deusto e Estremadura e os Centros Galegos de Santander, Barcelona, Salamanca, León, Vitoria, Llodio, Las Palmas de Gran Canaria, Valladolid, Sevilla ou Pamplona, e chegou tamén a Portugal, concretamente ao Centro Galego de Lisboa e ás Universidades do Miño (Braga) e Algarve (Faro).

Esta nova mostra continuará a súa andaina este ano percorrendo o Camiño Francés dende Pedrafita ata Santiago. Está composta por doce paneis, nos que se reflicte a vida e obra do escritor paradelense, considerado o mellor poeta obreiro galego do século XX, que escribiu en Cataluña a maior parte da súa obra, e foi ademais dun grande animador das actividades galegas nesta comunidade, o vínculo perfecto entre Galicia e os galegos emigrantes en Cataluña.