Adega continua co programa de roteiros cunha novo saída para este domingo que contará cun percorrido de dificultade baixa, arredor da Finca de Quintas, cunha lonxitude de entre 8 e 10 Km.
A Finca de Quintas foi un espazo agrogandeiro de case 200 ha no centro de Galicia, nunha zona relativamente chan entre a Serra do Careón e o río Ulla, unha paisaxe pouco habitual en Galicia á que contribúe decisivamente o peculiar substrato xeolóxico de rochas serpentiníticas.
É unha zona transitada polo lobo, cunha elevada riqueza de aves e, sobre todo, con vexetación e flora de extraordinaria rareza, que acolle varias especies exclusivas a nivel mundial, catalogadas en perigo crítico de extinción a raíz da acelerada transformación do uso da terra desta comarca nas últimas
décadas.
Neste contexto, a Xunta de Galicia anunciou que quere instalar sobre esta xoia natural unha fábrica de celulosas para elaborar fibras textís a partir de madeira de eucalipto. No roteiro darese a volta a toda a finca, a ambas marxes do río Seco, limite entre os concellos de Palas de Rei e Santiso, reivindicando a vital importancia de deter a perda de biodiversidade para a saúde do planeta e para un desenvolvemento humano sustentable.
Para máis información e realizar a reserva Adega pon a disposición esta páxina web. As persoas que estean interesadas en reservar praza, terano que facer a través do formulario de reserva antes do venres e cubriranse as prazas por orde de inscrición.
Os roteiros de Adega Lugo están abertos á participación de público de todas as idades. Para máis información, tamén se pode chamar ao teléfono 982 240299 ou escribir a adegalugo@adega.gal.