Tal e como se ven de facer público, o BNG presentará no vindeiro pleno municipal unha moción solicitando a redacción dun plan enerxético para Monforte.
O seu voceiro, Emilio José Sánchez, afirma que “con ese plan ademais do aforro económico, o Concello de Monforte contribuiría a reducir as emisións nocivas á atmosfera rebaixando o impacto negativo sobre o medio ambiente”.
“A brutal suba dos prezos da enerxía que actualmente estamos sufrindo, está a provocar un importantísimo incremento no gasto desta partida para as arcas municipais, algo que, por forza, implica a redución doutras inversións tamén necesarias para este noso concello. No pasado mes de agosto, o Consello de Ministros do Estado Español, a proposta do Ministerio para a Transición Ecolóxica, aprobou un Real Decreto Lei cun plan de choque de aforro e xestión enerxética”, engade Sánchez.
Segundo a opinión de Emilio Sánchez, concelleiro do BNG no Concello de Monforte de Lemos, “Monforte precisa dun plan que o oriente cara a un imprescindíbel aforro enerxético, e polo tanto económico, nos edificios, alumeado e demais infraestruturas públicas. Así mesmo, ademais do aforro económico, o Concello de Monforte contribuiría a reducir as emisións nocivas á atmosfera, rebaixando o impacto negativo sobre o medio ambiente”.
