Regresan a Begonte as Foliadas de Outono de Castiñeiro Milenario, que terán lugar o 19 de novembro con música, ocio e formación.
Como é tradición, non hai festa foliadeira en Castiñeiro, sen que haxa un momento dedicado á aprendizaxe. Desta volta propoñen un moi interesante obradoiro de percusión tradicional. Roberto Rodríguez, impartirá un obradoiro de iniciación ao toque coa Lata de pemento no repertorio de cantares para o baile tradicional.
O obradoiro comezará ás 19.30 horas e terá unha duración aproximada de hora e media e está aberto a calquera persoa que desexe ter un achegamento a este instrumento popular. O custe para persoas non socias é de 15 euros, mentres que para as persoas socias de Castiñeiro Milenario o prezo será de 5 euros.
É aconsellable anotarse enviando un correo a castineiromilenario@hotmail.com, chamando ao 616705174 ou por calquera das redes sociais. Se non se leva lata de pemento, a organización tentará de ter latas para todas.
Despois do tempo de formación, pasarán aos petiscos para repoñer forzas e dar paso aos momentos festeiros coa foliada propiamente dita, que empezará a partir das 22:00. O grupo local d@s Foliadeir@s do Castro, serán os encargados de romper o xeo e comezar a foliada. Seguidamente intervirán o dúo Gaiteirada desde Lugo e , despois duns anos, volven ás foliadas de Castiñeiro os amigos de Axeigo. Ao remate dos grupos, comezará a foliada aberta.
