A concelleira de Participación e Servizos para a Veciñanza, Cristina López, anunciou que o Goberno de Lugo vén de aprobar a modificación dos horarios de apertura do Cemiterio Municipal. A concelleira explicou que “ultimamente recibimos numerosas solicitudes reclamando distintos horarios de apertura, especialmente durante os domingos e festivos”, e engadiu “reorganizamos os horarios de apertura para que toda a veciñanza poida achegarse a esta instalación”.
Os novos horarios na época de outono e inverno (entre o 1 de novembro e o 1 de marzo) serán, de luns a sábado de 09:30 a 14:30 e de 16:00 a 18:00, mentres que os domingos e festivos, o cemiterio abrirá de 09:30 a 14:30. O horario de verán, entre o 2 de marzo e o 31 de outubro, será de luns a sábado de 09:30 a 14:30 e de 17:00 a 19:00 de luns a venres, e os domingos de 09:30 a 14:30.
Cristina Lopez animou a toda a veciñanza a visitar o Cemiterio de San Froilán, e a desfrutar “das distintas actividades que se organizan desde o Goberno de Lugo, como as visitas nocturnas ou as distintas actividades culturais organizadas durante todo o ano, que fixeron que o cemiterio de Lugo fose incluído na Ruta de Cemiterios Históricos Europeos e gañase o recoñecemento de National Geographic como un dos cemiterios máis bonitos do mundo”.
