Skip to main content
Lugo

Adxudicada a demolición do Garañón

Por 28 Decembro, 2022Sin comentarios

O Concello anuncia a adxudicación do contrato mixto para a redacción do proxecto, a dirección facultativa de obra e a demolición do Garañón a Xestión Ambiental de Contratas por un importe de 578.035 euros.

Con esta actuación, a rexedora avanza no cumprimento do seu compromiso para converter o espazo onde se levanta o Garañón nunha zona verde na súa totalidade, “dando resposta a unha demanda social de crear un novo pulmón verde na cidade que lle dea continuidade ás Costas do Parque e ao parque de Rosalía de Castro, ampliando deste xeito o cinto natural de Lugo o que contribuirá a integrar o río Miño na cidade, sendo coherentes co modelo sostible que impulso dende o 2015 e que aposta pola recuperación, renaturalización e creación de novos espazos para o esparexemento e lecer da cidadanía”.

Lara Méndez deu conta de que a empresa adxudicataria disporá de 30 días naturais máximo para presentar o proxecto de derruba e, posteriormente, doutros 120 para executar os labores correspondentes.

O procedemento, que se acometerá por execución subsidiaria, atende á contratación non só do proxecto visado de obras completo, senón tamén á reposición ao estado orixinal dos terreos, a execución das obras, así como a dirección facultativa necesaria das mesmas, que abranguerán a todo o edificado sen título habilitante.

A alcaldesa fixo fincapé en que as bases do contrato contemplan a obrigatoriedade de realizar un seguimento da obra cunha periodicidade mínimo de 15 días, coa intención de controlar o progreso das tarefas e verificar diferentes aspectos. Ademais, durante a execución dos traballos de derruba e acondicionamento da parcela, esta deberá estar debidamente delimitada cun valado de 2 metros de altura en todo o ámbito da URPI 58 que garanta a seguridade e impida o acceso de persoas alleas á mesma.

Ese peche perimetral deberá ser retirado posteriormente, con carácter previo á entrega da obra ao Concello, que se fará en perfectas condicións de limpeza e mesmo coa totalidade da contorna dotada de céspede.

De xeito paralelo a este proceso, o Concello segue a traballar na modificación puntual da unidade Urpi-58 do PXOM que comprende este espazo, mentres se renden contas, trimestralmente, ao Tribunal Superior de Xustiza de Galicia sobre os pasos dados para o cumprimento da sentenza sobre a reposición da legalidade urbanística na contorna.