A agrupación municipal do Courel, Caurel Vivo, vén de denunciar que caeu unha barronca nun tramo da estrada LU-651 á altura de Ferrería Vella, deixando habilitado só un carril.
Dende o grupo defenden que este feito xa se producira máis veces, como en marzo, cando caera tamén nesta mesma estrada e preto de Santa Eufemia.
Critican que, tras analizar varias formulas para arranxala definitiva, escolleuse a máis barata, pero non a máis segura e duradeira. A Xunta licitou con arredor dun millón de euros no acceso provisional e 4 meses despois xa sufriu gretas e socalcos.
Tamén din que o 1 de Abril de 2022 contratouse a mellora da estrada entre a Ferrería Vella a Seoane para arranxala no prazo dun ano e por importe de case tres millóns de euros, pero a 4 meses de rematar o prazo, “aínda non hai movemento de terras, polo que auguramos que incumpriranse os prazos”, explican.
E adelantan que van presentar unha moción para solicitarlle á Xunta que “deixen de poñer parches e atrancos coas comunicacións do Courel e que cumpran con obras seguras e duradeiras”.
