Skip to main content
Lugo

Un parque infantil e un aparcadoiro iniciativas municipais para a contorna de Fontiñas

Por 5 Xaneiro, 2023Xaneiro 6th, 2023Sin comentarios

A alcaldesa de Lugo, Lara Méndez, vén de manter un encontro coa veciñanza de Fontiñas para coñecer as súas necesidades actuais e poder atender, así, as demandas máis urxentes.

Unha reunión que se enmarca na habitual rolda de contactos que a rexedora mantén nos diferentes barrios e na que Méndez compartiu a preocupación xeralizada das e dos residentes por se o último proxecto coñecido para finalizar a Rolda Leste volve paralizarse unha vez máis, logo dos sucesivos cambios e vaivéns que experimentou nos últimos anos.

“Falamos dunha infraestrutura que resulta vital para o crecemento da cidade, segundo recoñeceu Méndez, e que está a condicionar o día a día desta contorna afectada dende hai moito tempo por unha sobre saturación do tráfico”.

A alcaldesa incidiu en que tanto esta avenida como a estrada do Rato son as principais vías de conexión co HULA. “Un centro sanitario que é hospital de referencia para toda a provincia e que propicia que miles e miles de vehículos transiten por elas cada xornada sen que toda esa circulación reverta dunha forma positiva porque a maioría dos traxectos son de paso, sen parada, o cal dificulta incluso a dinamización económica e a mobilidade de toda a zona”.

Lara Méndez lamentou que logo de ter solicitado a documentación técnica da actuación o pasado 19 de decembro á Consellería de Infraestruturas, o ente autonómico aínda non lle teña trasladado ningunha información ao respecto, “de maneira que tampouco sabemos de que xeito podemos colaborar dende o Concello para axilizala”.

A rexedora insistiu na relevancia da obra, impulsada por Touriño durante o seu mandato ao fronte da Xunta e paralizada durante máis dunha década por Núñez Feijoo, e amosou o seu firme compromiso de perseverar en esixir que se acometa a súa materialización. “Porque non se trata só de anunciala en cada campaña electoral, nin tampouco de asignarlle unha partida en cada orzamento, senón de licitala e executala para que dea soporte ás arterias de comunicación do municipio e alivio á Avenida das Fontiñas”, engadiu.

Así mesmo, Lara Méndez aproveitou a xuntanza para explicarlle ás persoas asistentes algúns dos proxectos municipais previstos polo Executivo local para o barrio, entre os que se atopa a creación dun novo parque infantil e dun aparcadoiro de carácter disuasorio. Unha intervención para a que o Concello leva xa tempo buscando a superficie axeitada, ante a inexistencia de parcelas municipais dispoñibles nas inmediacións, e que atopa o seu principal escollo na dificultade de que os terreos con maior viabilidade son particulares e as respectivas propiedades amósanse reticentes á cesión.