As novas instalacións do Centro de Atención e Información da Seguridade Social (CAISS) de Monforte de Lemos foron inauguradas pola subdelegada do Goberno en Lugo, Isabel Rodríguez
Isabel Rodríguez comprobou o resultado das obras de rehabilitación integral deste edificio, que contaron cun investimento de 514.000 euros do Ministerio de Inclusión, Seguridade Social e Migracións, acompañada da tenente de alcalde, Gloria Prada, e do director provincial do Instituto Nacional da Seguridade Social e da Tesourería Xeral da Seguridade Social, Juan José Rodríguez Gude, así como de outros membros do equipo de goberno municipal.
Rodríguez manifestou a importancia das obras para “mellorar e fortalecer un servizo imprescindible para a cidadanía, máis necesario que nunca para desenvolver con éxito o incremento por parte do Executivo Central de prestacións tan importantes como as pensións e o Ingreso Mínimo Vital, que protexen ás clases medias e traballadoras da provincia”.
Así, dixo que “o Goberno cumpre o compromiso feito aos veciños e veciñas das comarcas de Lemos, Chantada e Quiroga, ofrecendo un mellor servizo ao público, nunhas instalacións máis confortables e mellor acondicionadas”.
Por outro lado, a subdelegada agradeceu ao Concello de Monforte de Lemos a súa colaboración, xa que mentres estiveron en marcha as obras, o CAISS trasladouse ao Edificio Multiusos de titularidade municipal, a menos de 200 metros de distancia do actual centro, situado na rúa San Pedro.
Melloras nos servizos
Grazas a estes traballos o novo local conta cunha zona de acceso, recepción e espera, un amplo espazo con cinco postos de atención ao público, unha sala de reunións e outra de autoxestión, “permitindo ofrecer unha atención personalizada e máis próxima ao cidadán, ademais de potenciar a calidade do servizo”, engadiu a subdelegada.
A subdelegada, que supervisou o inicio da actividade nas novas dependencias, explicou que contan cun “edificio diáfano, accesible e cunha superficie de 350 metros cadrados, con zonas de traballo e de espera do público redistribuídas, ademais de aumentar a luminosidade e a eficiencia enerxética do edificio, que garanten o acceso á xestión das prestacións, un piar fundamental do Estado de Dereito”.
A Seguridade Social dá servizo nas súas dependencias de Monforte de Lemos a unha poboación de máis de 55.000 persoas das comarcas de Lemos, Chantada e Quiroga, atendidos, na actualidade, por 5 empregados públicos.
Ademais de prestar atención presencial e telefónica a través do CAISS, no INSS pódense realizar trámites en liña, a través da páxina www.seg-social.es. Para iso, a persoa debe dispoñer dun certificado dixital (DNIe, Cl@ve permanente ou certificado da FNMT) ou ter declarado o seu móbil á Seguridade Social.
