Skip to main content
Vilalba

Ampla reposta á protesta polo estado do servizo de pediatría en Vilalba

Por 22 Xaneiro, 2023Sin comentarios

Centos de vilalbeses sumáronse este sábado á concentración organizada por Vilalba Aberta para facer presión ao respecto da necesidade de reverter os recortes no Centro de Saúde. Logo de sacar adiante varias iniciativas no Pleno en relación coa “insostible situación” da atención primaria no municipio, a formación municipalista convocou esta acción de protesta en contra do desmantelamento do servizo de pediatría e na defensa da sanidade pública.

A concentración tivo lugar diante do Centro de Saúde da localidade, co obxectivo de, en palabras de Modesto Renda, “transformar a indignación nun clamor veciñal na defensa da atención primaria” e pola “recuperación dos servizos desmantelados, sendo pediatría prioritario en base ao número de familias usuarias.”

Porque a razón última deste novo paso adiante é, para Renda, a “absoluta vergoña que representa o feito de que os dous cupos de pediatría estean sendo cubertos por médicos de familia no canto de por especialistas na materia e que, por se fora pouco, nas últimas semanas nin tan sequera se cubran as baixas destes últimos”.

Así, e ao tempo, na mobilización organizada por VA denunciarase tamén o “desmantelamento da atención especializada de reumatoloxía” e o agravio que para Vilalba supón que “dende hai tres anos haxa servizo de oculista.”