O Concello de Triacastela aposta, outro ano máis, polos paseos de Guido Álvarez, o guía turístico lucense máis coñecido polo seu proxecto Guido Guía.
A través do Camiño Xacobeo e conxuntamente coa Xunta de Galicia, o concello ofrecerá catro saídas diferentes para os meses de xullo, agosto, setembro e outubro completamente gratuítas e para todos os públicos no marco da iniciativa ‘Triacastela Xacobea’.
O ano pasado esta iniciativa tivo grande éxito, xa que máis de 100 persoas de diferentes nacionalidades formaron parte do primeiro ciclo, unha gran oportunidade para descubrir e redescubrir as riquezas da localidade, desfrutar da natureza e de coñecer xente.
De feito, os catro paseos do ano pasado brindaron aos participantes a oportunidade de mesturar xente local e da provincia con visitantes de fóra, convertendo as andainas nunha experiencia heteroxénea e de intercambio cultural.
Este ano, os paseos terán lugar os días 22 de xullo, 17 de agosto, 23 de setembro e 28 de outubro e neles visitaranse algúns dos lugares do primeiro ciclo, como a capela de San Mamede, os miradoiros, o Camiño Francés, o núcleo urbano e tamén haberá novidades e alternativas.
A hora de inicio dos paseos será ás 11.00 horas e terán unha duración de entre 2 e 3 horas e a dificultade dos paseos será media e media-baixa.
Anotarse aos paseos guiados
Para inscribirse nestes paseos hai que enviar un correo electrónico a Guido no seu correo guidoguiaturismo@gmail.com e confirmar a asistencia.
A alcaldesa de Triacastela, Olga Iglesias, convida a participar de novo nesta experiencia que permitirá profundar no coñecemento do municipio e descubrir unha contorna en plena natureza chea de reclamos e sorpresas.
