Rematadas as novas canalizacións de saneamento de pluviais e fecais, telecomunicacións, subministro eléctrico e abastecemento de auga, os veciños da rúa Curros Enríquez xa dispoñen de acceso aos seus garaxes. Anunciouno o alcalde, Fran Cajoto, que explica: “estamos a facer unha obra completa, con renovación de todos os servizos. Iso implica a apertura de zanxas e maiores incomodidades durante a execución das obras, pero tamén asegura que a rúa non teña problemas no futuro e dure no tempo” .
O rexedor municipal contrapón esta forma de proceder, que tamén se aplicou na rúa Costa do Castro, ao acontecido en obras do goberno anterior como a avenida da Mariña, “na que nin tan sequera se renovou o abastecemento -con tubaxes de chumbo- e na que o formigón do firme está completamente escachado a pesar do recente da actuación”.
Fran Cajoto informa que durante a construción das novas beirarrúas en Curros Enríquez faranse cortes puntuais aos garaxes. As novas beirarrúas contarán cun mínimo de 2 metros de ancho en todo o eixo entre a Glorieta de Vilalba e o Campo da Cabana e “transformarán unha rúa inaccesible nunha avenida cómoda, segura, co tráfico calmado e que se transformará na mellor conexión peonil entre o casco urbano e a Rapadoira. Quizais a mellor rúa de Foz”.
O goberno municipal contempla a reserva de zonas de verdes de estacionamento só para residentes no entorno máis próximo da Praza de Galicia para facilitar a parada de vehículos, especialmente a aqueles veciños que non contan con garaxe. Neste sentido, o alcalde recorda que “as portas do Concello están sempre abertas para todo aquel que precise dunha maior información. Puiden atender persoalmente a unha comunidade de propietarios e a dous veciños particulares en relación coas acometidas das vivendas á rede de saneamento. A nosa intención é resolver os problemas que poidan xurdir da forma máis áxil posible para que a obra sexa completa e resolva os problemas que existen actualmente. Pedimos desculpas polas molestias causadas, seguimos traballando”.
