Iago Bande Cortizo foi elixido por unanimidade pola asemblea local da organización como candidato para ás vindeiras eleccións municipais do 28 de maio.
O actual portavoz e concelleiro do Bloque Nacionalista Galego en Láncara, volverase presentar ás eleccións “para que Láncara avance, desde a transparencia, a participación veciñal, a boa xestión e as ideas claras nun proxecto que emocione á veciñanza”, defendeu.
Así, sostivo que “o BNG dará o impulso que precisa Láncara para abrir un tempo novo con firmeza e ilusión” e subliñou que “saímos a por todas para dar pasos adiante na mellora da vida da veciñanza, é o momento de sumar co BNG e desenvolver un proxecto de futuro”.
O candidato á alcaldía destacou que “imos transformar este concello, estamos convencidos de que as potencialidades hai que poñelas a funcionar, como o talento e as boas ideas que se poden xerar aquí, contribuíndo a establecer poboación e apostar por un futuro que ilusione á xente moza, promovendo os servizos públicos e os mellores servizos á veciñanza”.
