Skip to main content
O Corgo

Francisco Otero presentou a súa candidatura no Corgo polo PSOE

Por 13 Maio, 2023Sin comentarios

O candidato do PSdeG para as municipais do próximo 28 de maio destacou nun encontro celebrado entre a candidatura, afiliados e simpatizantes que as súas prioridades son frear a perda de poboación, atender aos maiores, levar os servizos básicos a todas as parroquias e pelexar por asentar a ESO no centro escolar do concello.

A Agrupación Socialista do Corgo presentou este venres a candidatura coa que concorrerá ás eleccións municipais do 28 de maio e que encabeza Francisco Otero. “Imos loitar e traballar para que O Corgo sexa o mellor concello da contorna”, asegurou o candidato do PSdeG nun encontro que tivo lugar no Restaurante Playa da localidade entre a candidatura, afiliados e simpatizantes.

A alcaldesa de Lugo e Vicesecretaria Xeral do PSdeG, Lara Méndez, e o deputado no Congreso e número 4 na lista dos socialistas polo Corgo, Javier Cerqueiro, acompañaron a Otero nesta cita á que asistiron outros responsables orgánicos do partido e ducias de militantes, simpatizantes, e veciños e veciñas do concello e da comarca.

“Temos unha situación xeográfica envexable en comparación cos municipios do noso redor, pero pola contra, as políticas que se levaron a cabo todos estes anos non foron capaces de poñernos ao nivel que o noso concello e todos nós como veciños e veciñas merecemos”, sinalou o candidato socialista.

Francisco Otero explicou que no Corgo “seguimos perdendo habitantes e os nosos rapaces e rapazas non encontran os alicientes necesarios para que se queden aquí”. Nese sentido, o candidato á Alcaldía apuntou que as súas prioridades son frear a perda de poboación, atender aos maiores e levar os servizos básicos a todas as parroquias. Respecto do colexio foi claro ao afirmar que “nunca debemos permitir que non se asentara a ESO no centro escolar do concello e loitaremos para reverter esa nefasta decisión”.

Un equipo moi ligado ao territorio

“Acompáñame un equipo de xente unida, comprometida e ambiciosa. Veciños e veciñas moi ligados ao territorio, persoas vencelladas a asociacións e profesionais de todo tipo”, destacou Francisco Otero da candidatura que encabeza. Persoas con ganas de dinamizar un municipio no que a poboación está moi dispersa e no que “convén chamar a todas as portas”.

Ao respecto diso, apuntou a importancia de levar na lista ao Deputado no Congreso Javier Cerqueiro, “porque nos sitios pequenos necesitamos o respaldo doutras administracións e trátase dun valor engadido que ten a nosa candidatura”.

Precisamente nese sentido o propio Cerqueiro asegurou que “estamos nun tempo de retos demográficos e sociais moi importantes e hai fondos para afrontalos, pero hai que presentar proxectos para poder optar ás diferentes axudas. Nós temos equipo, ganas e ilusión para facelos e tamén a posibilidade de movelos en Madrid”.

Valorou o Deputado no Congreso a Francisco Otero asegurando que “é un candidato novo, que coñece o pobo, que ten resistencia política e que, sobre todo, sabe traballar e xestionar equipos”.

Candidatura do PSdeG ás eleccións municipais do Corgo

A candidatura socialista do Corgo está composta polos seguintes candidatos e candidatas:

  1. Francisco Otero Besteiro
  2. Roberto Besteiro Queizán
  3. Alba Salvador López
  4. Javier Cerqueiro González
  5. María Elena Roldán Fernández
  6. Raquel Expósito Jato
  7. Mónica Díaz Mosquera
  8. Bernardino Castro López
  9. Otilia Herbón Fernández
  10. José Benigno Núñez Doval
  11. Elías López Vila

Suplentes: Maximino Marey Muíña, Cristina Pérez López e José Miguel Vázquez Calvo.