O PSOE de Sarria defende que o medio rural “é un dos impulsores da economía da nosa comarca, por iso debemos darlle a importancia que merece” e propoñen varias iniciativas para impulsalo.
En primeiro lugar, explican que é necesario un plan para a rexeneración e mantemento das pistas rurais que se adapte ás esixencias actuais de anchura e resistencia. Ademais, argumentan “hai que poñer en marcha un plan de desbroce e limpeza de cunetas e actuacións de reforma e mellora das escolas rurais”.
Por outra parte, fan fincapé no feito de que hai malas comunicacións nalgunhas parroquias: “Debemos mellorar a calidade de vida dos veciños do rural coa promoción de servizos relacionados cas novas tecnoloxías, como o 5G, fibra óptica, etc”.
Como defendeu o candidato socialista á Alcaldía nos últimos meses, Benjamín Escontrela, desde a agrupación socialista cren que “merece especial importancia a esixencia á Dirección Xeral do Catastro da inmediata paralización do procedemento de valoración de bens inmobles dentro dos núcleos rurais”.
Por último, expoñen que “hai que potenciar a produción, venda e consumo de produtos relacionados ca gandaría e agricultura locais, ademais de incentivar un Plan de Mellora dos Núcleos Rurais, que permita dotalos de todos os servizos”.
