Co escrutinio completo, Vilalba queda pendente dun pacto xa que ningún dos partidos logrou a maioría absoluta. O PP sobe un o número de concelleiros pero o PSOE de Elba Veleiro perde en favor de Vilalba Aberta, que sobe 1 e do BNG que entra na Corporación. Nas Pontes, a ampla vantaxe que tiña o PSOE desaparece e queda con maioría absoluta xusta. O BNG gaña un concelleiro.
En Castro de Rei o PP mantense con Francisco Balado e gaña un concelleiro o BNG, que perde o PSOE. En Guitiriz, finalmente parece que Marisol Morandeira non perde a maioría absoluta xa que houbo un erro na comunicación dos resultados dunha mesa. Confirmado polo PSOE e polo BNG, faría que a alcaldesa sumase os 7 concelleiros e o BNG quedase con 2 e non 6/3 como din os datos do Ministerio, que non se correxirán ata a reunión da Xunta Electoral nuns días.
En Outeiro de Rei todo segue igual con maioría de José Pardo. En Cospeito gaña un concelleiro o PP de Armando Castosa e o BNG perde a representación. En Begonte o PP de José Ulla recupera un concelleiro, que perde o PSOE xa que o PP mantense. Jose María López Rancaño asegura por unha escasa marxe a Alcaldía de Abadín malia perder un concelleiro en favor do PSOE.
Na Pastoriza o PSOE de Primitivo Iglesias perdeu un concelleiro en favor do PP e queda en igualdade de condicións co BNG polo que xuntos poderían superar aos populares na loita pola Alcaldía.
En Muras mantense a situación dos anos anteriores cos votos repartidos entre PP e BNG e o PSOE cun concelleiro. Tamén estabilidade en Xermade con maioría socialista de Roberto García.
Francisco Fernández Montes queda fóra da Alcaldía de Rábade xa que o PP obtivo a maioría absoluta tras perder un concelleiro o grupo independente. En Pol poucos cambios, Lino Rodríguez perde un concelleiro en favor do PP pero ten maioría abrumadora para gobernar. En Meira tamén perde presenza o PSOE pero segue tendo a maioría absoluta.
A Riotorto volve o bipartidismo. Mantén os 6 concelleiros o PP de Clemente Iglesias e o BNG faise cos outros tres.
José Ángel Santos, en Friol, mantén unha abrumadora maioría co escrutinio sen terminar, a mesma que nas últimas eleccións, pero é o BNG o que ten a representación que perde o PSOE.
| Concello | Concelleiros totais | Concelleiros maioría | PSOE | PP | BNG | Contamos | Independientes | Vilalba Aberta | VOX |
| A Pastoriza | 11 | 6 | 3 | 5 | 3 | – | – | – | – |
| Abadín | 11 | 6 | 5 | 6 | – | – | – | – | – |
| As Pontes | 13 | 7 | 7 | 2 | 4 | – | – | – | – |
| Begonte | 11 | 6 | 1 | 9 | 1 | – | – | – | – |
| Castro de Rei | 13 | 7 | 3 | 8 | 2 | – | – | – | 0 |
| Cospeito | 11 | 6 | 4 | 7 | 0 | – | – | – | – |
| Friol | 11 | 6 | 0 | 10 | 1 | – | – | – | – |
| Guitiriz | 13 | 7 | 6 | 4 | 3 | – | – | – | – |
| Meira | 9 | 5 | 5 | 3 | 0 | 1 | – | – | – |
| Muras | 7 | 4 | 1 | 3 | 3 | – | – | – | – |
| Outeiro de Rei | 13 | 7 | 1 | 9 | 3 | – | 0 | – | – |
| Pol | 9 | 5 | 6 | 2 | 1 | – | – | – | – |
| Riotorto | 9 | 5 | 0 | 6 | 3 | – | – | – | – |
| Rábade | 9 | 5 | 1 | 5 | 0 | – | 3 | – | – |
| Vilalba | 17 | 9 | 5 | 8 | 1 | – | – | 3 | – |
| Xermade | 9 | 5 | 5 | 4 | – | – | – | – | – |
