Os casos activos seguen subindo malia que os contaxios novos decaen. Este débese de novo ao descenso do número de altas. Así, hoxe hai 447 en toda a provincia, 33 máis que onte, cando o aumento a xornada anterior foi de 19. Diagnosticaron nas últimas 24 horas 46 casos novos (onte foron 55 e o día anterior 62), e as altas chegaron ás 12.966 (8 nun día), o día anterior foron 35.
Dende que comezou a pandemia, no mes de marzo do pasado ano, hai 13.635 casos rexistrados e 217 persoas falecidas.
A presión hospitalaria mantense en 6 persoas ingresadas. No Hula hai 1 na UCI e 4 en planta; ademais dun hospitalizado na Mariña.
O Comité clínico pola súa banda mantén a Sarria en alerta alta, o único concello con restricións.
POR COMARCAS
O gromo causado nunha voda en Castro de Rei, Meira e A Pastoriza volve dar novos positivos cos tres concellos en niveis de alerta. Lugo tamén está en situación de risco á que se suma Friol. Lourenzá e Carballado seguen con niveis altos de incidencia pero mellora en Triascastela.
A Mariña
- Viveiro suma 1 caso máis e xa son 12, aínda coa incidencia moi baixa.
- Lourenzá segue coa incidencia moi alta malia non chegar a 10 contaxiados.
- Con algún caso activo e baixa incidencia están Foz, Ribadeo, Cervo, Xove, Riotorto e Mondoñedo. Súmase Burela, que levaba 15 días sen casos novos.
- O Vicedo e A Pontenova fai unha semana que non teñen contaxios novos.
- Sen casos novos máis de 15 días están Ourol, Barreiros, O Valadouro, Alfoz e Trabada.
Terra Chá
- Cospeito, Vilalba, As Pontes, Begonte, Outeiro de Rei e Pol teñen casos pero con baixa incidencia. Únese Guitiriz.
- Castro de Rei con 18 casos (2 máis), e Meira, A Pastoriza e Friol con menos de dez teñen a incidencia moi alta.
- Rábade leva unha semana sen casos novos.
- Sen positivos dende hai máis de quince días están: Muras, Xermade, Abadín.
Centro da provincia
- Os casos en Lugo seguen crecendo sen control ata 186 (15 máis), xa en niveis de alerta.
- Portomarín, Guntín, O Corgo, Palas, Antas de Ulla, As Nogais, Becerreá, Monterroso e Castroverde teñen positivos pero con baixa incidencia.
- Limpos de covid nos últimos quince días están: Negueira de Muñiz, Baleira, Pedrafita, Baralla, Ribeira de Piquín, Cervantes, A Fonsagrada e Navia de Suarna.
Comarca de Sarria
- No gromo de Sarria volven baixar os casos. Son 66 (2 menos).
- Láncara e Triacastela seguen rebaixando a incidencia.
- Paradela volve ter casos pero con baixa incidencia.
- Samos, O Páramo e O Incio seguen limpos de covid dende fai máis de dúas semanas.
Ribeira Sacra
- Monforte sobe a 13 casos (1 máis) e mantén a incidencia baixa.
- Carballedo ten a incidencia alta pero segue por debaixo de dez casos.
- Quiroga, Pantón, O Saviñao e Chantada teñen casos pero con baixa incidencia.
- Taboada e Sober levan sen contaxios novos unha semana.
- Sen casos en máis de quince días: Ribas de Sil, Bóveda, A Pobra de Brollón e Folgoso do Courel.
MÁSCARAS
A subdelegada do Goberno, Isabel Rodríguez, entregou ao tenente de alcaldesa de Lugo, Miguel Fernández, e ao deputado provincial de Promoción Económica e Social, Pablo Rivera, outras 50.000 máscaras que distribúe o Goberno aos concellos da provincia con destino a colectivos vulnerables.
Isabel Rodríguez lembrou que “con esta xa levamos oito campañas, dúas delas este ano, de distribución de máscaras cirúrxicas na provincia desde o comezo da pandemia nas que levamos repartidas ata hoxe 576.500 unidades tanto a concellos como a entidades sociais”.
A subdelegada entregou un lote de 15.000 máscaras ao tenente de alcaldesa de Lugo e as restantes 35.000 recolleunas o deputado provincial de Promoción Económica e Social, xa que a Deputación faise cargo, de novo, do operativo de distribución entre os concellos da provincia que teñen poboación inferior a 20.000 habitantes, tal e como acordaron o Goberno e a Federación Española de Municipios de Provincias.
