A covid segue disparada na provincia de Lugo cun crecemento continuo que trae maior hospitalización pero cunha subida máis lenta nestes casos. Esto é debido a que seguen aumentando os contaxios novos e as altas foron practicamente inexistentes.
Deste xeito, hai 936 casos activos, 139 máis que onte, cando a subida o día anterio foi de 97. Diagnosticaron nas últimas 24 horas 149 casos novos (onte foron 119 e o día anterior 100), e as altas chegaron ás 13.083 (4 nun día), o día anterior foron 15.
Dende que comezou a pandemia, no mes de marzo do pasado ano, hai 14.241 casos rexistrados e 217 persoas falecidas.
A presión hospitalaria sobe de novo con 10 persoas ingresadas (1 máis). No Hula hai 8 en planta; 1 na Mariña e 1 en Monforte. As UCI seguen baleiras por terceiro día consecutivo.
O Comité clínico pola súa banda mantén a Sarria en alerta alta, o único concello con restricións na provincia.
POR COMARCAS
A Mariña continúa sumando casosnde forma descontrolada e xa non queda ningún concello limpo de covid. No resto, estabilidade agás nas vilas de maior poboación como Vilalba, Lugo, Chantada, Monforte e Sarria, que volve sumar positivos.
A Mariña
- Viveiro dispárase a 74 casos (28 máis), Cervo suma xa 20 casos (7 máis), Foz 53 (13 máis), Ribadeo 32 casos (11 máis), Lourenzá con 10 e Burela a 26 (6 máis), todos en valores de alerta alta. Ourol con menos de dez casos tamén ten a incidencia moi alta.
- Con algún caso activo e incidencia controlada están Xove, Mondoñedo, Barreiros, A Pontenova, Alfoz, O Vicedo e O Valadouro. Únese Trabada.
- Riotorto leva unha semana sen casos.
Terra Chá
- Vilalba chega a 24 casos (5 máis).
- As Pontes, Outeiro de Rei, Guitiriz, Friol e Rábade teñen casos pero con baixa incidencia. Únese de novo Pol.
- Castro de Rei con 18 casos (2 Máis), Meira con 14, A Pastoriza con 13 (2 máis) e Cospeito xa por debaixo de 10 teñen a incidencia alta.
- Begonte leva unha semana sen casos.
- Sen positivos dende hai máis de quince días están: Muras, Xermade e Abadín.
Centro da provincia
- Os casos en Lugo seguen crecendo sen control ata 348 (28 máis), en niveis de alerta.
- Ribeira de Piquín, Monterroso e Becerreá están con incidencia elevada con menos de dez casos.
- Guntín, O Corgo, Palas, Baleira, A Fonsagrada, Pedrafita, Castroverde e Antas de Ulla teñen positivos pero con baixa incidencia.
- As Nogais e Portomarín está sen casos na última semana.
- Limpos de covid nos últimos quince días están: Negueira de Muñiz, Baralla, Cervantes e Navia de Suarna.
Comarca de Sarria
- No gromo de Sarria volven subir os casos. Son 64 (5 máis).
- Láncara ten a incidencia baixa. Únese Samos.
- Paradela sobe a 11 casos con incidencia alta. O Páramo tamén ten a incidencia alta pero con menos de dez casos.
- Triacastela leva unha semana sen casos.
- O Incio segue limpo de covid dende fai máis de dúas semanas.
Ribeira Sacra
- Monforte sobe a 40 casos (2 máis).
- Bóveda ten alta a incidencia ao igual que Sober.
- Chantada sobe bruscamente a 18 casos (7 máis).
- Taboada, O Saviñao e Pantón teñen casos pero con baixa incidencia.
- Quiroga leva sen contaxios novos unha semana. Únese Carballedo.
- Sen casos en máis de quince días: Ribas de Sil, A Pobra de Brollón e Folgoso do Courel.
