A covid aumenta o ritmo de crecemento con 123 casos activos máis en 24 horas chegando a acadar xa os 1.364. Esta cifra obtense por 174 novos contaxios que sumaron neste tempo e as 51 altas.
Na xornada de onte foi de 102 o aumento de casos activos, con 128 novos positivos e 24 altas.
Ademais, dende que comezou a pandemia, no mes de marzo do pasado ano, hai 14.784 casos rexistrados e 217 persoas falecidas.
A presión hospitalaria mantense en 15 persoas ingresadas pero un dos enfermos entrou na UCI. No Hula hai 8 en planta (3 menos) e 1 na UCI; 5 na Mariña (2 máis) e 1 en Monforte.
POR COMARCAS
A Mariña continúa descontrolada, ao igual que Lugo e a nivel xeral os casos seguen subindo nas vilas máis poboadas.
A Mariña
- Viveiro dispárase a 138 casos (23 máis), Cervo suma xa 30 casos (7 máis), Burela 87 (22 máis), Foz 80 (11 máis), Ribadeo 53 (4 máis) e Mondoñedo 18 casos (2 máis), todos en valores de alerta alta ou máxima. Súmase Barreiros con 10 casos.
- Ourol, O Valadouro e Lourenzá, con menos de dez casos, tamén teñen a incidencia moi alta.
- Con menos de dez tamén pero coa incidencia en valores de risco están Xove, Alfoz e O Vicedo.
- Con algún caso activo e incidencia baixa está Trabada.
- Riotorto leva unha semana sen casos. Súmase A Pontenova.
Terra Chá
- Vilalba chega a 40 casos (3 máis) e coa incidencia preto de valores de alerta.
- Castro de Rei con 14 casos (3 máis), Meira con 13 e A Pastoriza tamén con 13 teñen a incidencia alta pero estase reducindo.
- Rábade con menos de dez casos está en alerta moi alta.
- As Pontes ten 18 casos (7 máis) e ponse en zona de risco.
- Outeiro de Rei, Guitiriz, Friol, Pol, Begonte, Cospeito e Abadín teñen casos pero con baixa incidencia.
- Sen positivos dende hai máis de quince días están: Muras e Xermade.
Centro da provincia
- Os casos en Lugo seguen crecendo sen control ata 434 (38 máis), xa coa incidencia alta.
- Monterroso con 12 casos e Palas con 11 están con incidencia elevada. Súmase Portomarín con menos de dez.
- Guntín, O Corgo, Pedrafita, Castroverde, Becerreá, As Nogais, Cervantes, A Fonsagrada e Baralla teñen positivos pero con baixa incidencia.
- Antas de Ulla, Baleira e Ribeira de Piquín están sen casos na última semana.
- Limpos de covid nos últimos quince días están: Negueira de Muñiz e Navia de Suarna.
Comarca de Sarria
- Sarria reduce a 60 casos (3 menos).
- Paradela e O Páramo baixan de dez casos pero seguen con incidencia moi alta.
- Láncara e Samos teñen a incidencia preto de valores de alerta.
- O Incio e Triascastela seguen limpos de covid dende fai dúas semanas.
Ribeira Sacra
- Monforte sobe a 52 casos (7 máis).
- Chantada sobe de novo a 32 casos (3 máis).
- O Saviñao e Bóveda, con menos de dez casos ambos, están en valores preto de alerta.
- Sober, Pantón, Carballedo, Taboada e A Pobra de Brollón teñen casos pero con baixa incidencia.
- Sen casos en máis de quince días: Ribas de Sil, Folgoso do Courel e Quiroga.
CRIBADOS EN FOZ, RIBADEO, VIVEIRO e BURELA
Debido ao aumento de casos, o Sergas programou un cribado masivo a partir do hoxe entre profesionais que exercen a súa actividade en Foz de cara ao público.
Por outra banda, un total de 834 persoas con idades comprendidas entre os 18 e os 29 anos están sendo chamadas polo Sergas para someterse a un cribado masivo o venres, 23 de xullo, en Ribadeo.
En Viveiro, tamén haberá cribado, será o sábado, 24 de xullo, dirixido a mozos e mozas de entre 18 e 30 anos e que se levará a cabo no Pavillón Municipal. O Sergas citará aos mozos remitíndolles un SMS.
En Burela, o alcalde tamén solicitou un cribado entre a poboación para a próxima semana debido ao drástico crecemento de casos.