Casting é un novo espectáculo do grupo amador lucense Hipócrita Teatro. Na traxectoria deste grupo, que naceu no 2004, son frecuentes as parodias e as comedias acedas e Casting abonda nesta liña.
A historia, que se poderá ver no teatro Pastor Díaz de Viveiro o sábado 23 ás 20.30 horas, está protagonizada por personaxes que representan algúns dos estereotipos femininos creados pola industria cinematográfica de Holywood, prototipos de muller que se instalaron no inconsciente colectivo de varias xeracións.
A obra, dirixida por Elea López (membro da compañía profesional Ítaca Teatro) recréase na sobreactuación e na esaxeración dos trazos característicos para amosar o grotesco e esperpéntico destes modelos.
María García, Marta Arias, Natalia Fernández e Juan Rivas dan vida ós personaxes protagonistas, tres actrices e un produtor de cine.
