Por Adrián Fernández.
Chegou, por fin, o momento máis esperado, o comezo da tempada 21/22 da ACB e non puido empezar de mellor maneira. Dúas vitorias e unha derrota contra o Barcelona no Palau é o balance, sendo líderes da liga as dúas primeiras xornadas.
Empezaba a liga nacasa, no Pazo, ante un durísimo rival como é o Lenovo Tenerife e as ganas e a tensión podíanse notar no ambiente, pero Musa encargouse deseguido de disipar as dúbidas; 16 puntos sen fallo no primeiro cuarto foi a súa carta de presentación na ACB, e unha demostración do que pode dar ao Breogán. Entre el e Mahalbasic (12 puntos e 12 rebotes), e unha actuación sobresaínte de todo o equipo, chegou a primeira vitoria do ano (92-73) e líderes, algo anecdótico pero ilusionante.
Despois tocou ir a Burgos entre semana e ver o noso rendemento fóra de casa, e o equipo non defraudou; demostrou que é un equipo serio e que hai que estar ao cen por cen para gañar a este equipo. Burgos acusou as baixas e na segunda parte non puido co vendaval do Breogán, ao final 62-87 para os de Lugo con Bell-Haynes como máximo anotador con 20 puntos e unha moi boa actuación xeral de todo o equipo celeste, 2-0 e +44 de average mantíñanos líderes unha xornada máis.
Coa sensación do traballo ben feito chegaron a Barcelona dispostos a dar a sorpresa. Esta vez non puido ser, pero a imaxe que deixaron é para estar moi satisfeitos, competiron da ti á ti contra un dos favoritos chegándose a poñer a un punto a falta de oito minutos. Musa o mellor con catorce puntos e outros tres xogadores por riba dos dez para acabar perdendo 78-69.
Un bo comezo para un Breogán que parece que, esta vez si, ten un equipo competitivo e compensado. Co talento de Musa, Bell-Haynes e Kalinoski e o traballo e sacrificio do resto, encabezado polos irmáns Quintela, que deron un paso adiante, o Breogán é un equipo serio que sabe ao que xoga e que non ten altibaixos nos partidos, algo indispensable para alcanzar o obxectivo da salvación. Agora vén un mes de outubro cargado con cinco partidos, tres na casa, Betis, Real Madrid e UCAM Murcia, e dous fóra, Unicaja e CAI Zaragoza.
Mentres nos respecten as lesións, parece que poderemos sacar cousas positivas e manter a ilusión durante máis tempo.
