O Servizo de Gandaría de Lugo impartirá cursos sobre benestar animal
Os lucenses poderán participar no edificio administrativo da Xunta de cursos sobre benestar animal organizados pola Consellería do Medio Rural e a Axencia Galega da Calidade Alimentaria. O primeiro -centrado no transporte- está programado entre o luns 22 e o xoves 25 de novembro, mentres o segundo -relacionado coas explotacións avícolas de carne e de posta- está fixado entre o luns 29 de novembro e o xoves 2 de decembro, ambos con 20 horas de duración de 16,00 a 21,00 h.
Impartido polo Servizo de Gandaría de Lugo, a acción de benestar animal no transporte está dirixida especialmente a transportistas con persoal ao seu cargo e a coidadores durante o transporte, para mellorar as súas competencias e diminuír o número de incidencias. Así, abordaranse temas como a saúde e a seguridade no traballo, o manexo, a hixiene e a prevención sanitaria ou a lexislación sobre benestar animal. Haberá un módulo xeral e outro específico, ambos con casos prácticos e proba de aptitude final.
No que se refire á formación para explotacións avícolas, está concibida fundamentalmente para facilitarlles aos produtores unha nova visión dos aspectos sanitarios e de bioseguridade máis esixentes relacionados co transporte neste tipo de granxas. Deste xeito, primeiro trataranse as particularidades da produción avícola e logo as diferencias entre as distintas especies, para continuar cunha introdución ao benestar animal. Seguidamente, abordaranse os requisitos mínimos aplicables nestas explotacións, os coidados de emerxencia e medidas preventivas así como as novas tecnoloxías para o control ambiental das naves de produción, para finalizar cunha proba de aptitude.
As actividades están dirixidas en xeral a persoas vinculadas profesionalmente coa agricultura, a gandería, a industria agroalimentaria e o sector forestal ou con expectativas de incorporación, en especial mozos e mozas do rural galego.
A Axencia Galega da Calidade Alimentaria, a través da formación non regrada e dentro do Plan de formación continua 2021, pretende contribuír á consecución do aumento da competitividade do sector agrícola e forestal tanto a nivel técnico como económico mediante a oferta de cursos coma estes.