A Asociación de Veciños, Comerciantes e Industriais Distrito da Milagrosa de Lugo celebrará a XXV edición da súa xa tradicional Feira de Produtos do Campo e Artesanía, os próximos días 20, 21 e 22 de maio de 2022.
O Pregoeiro, nesta ocasión, o día 20 de maio, e que dará inicio, oficialmente, á devandita Feira será o Presidente da Excelentísima Deputación Provincial de Lugo, José Tomé Roca.
Este encontro pretende ser un escaparate, con carácter internacional, de produtos de Lugo, reivindicando, ademais, o marcado carácter rural desta zona, e referendado polo feito de que se fai coincidir esta celebración coa festividade de San Isidro Labrador.
Na última edición celebrada en setembro do 2021 foron 40 vendedores de toda Galicia e de Oviedo os que achegaron os seus produtos de primeira calidade, á praza que xa é punto de encontro para pequenos e maiores e un dos principais lugares de reunión interxeracional da cidade.
Noutras edicións, a programación da feira contou con actuacións culturais, degustación de produtos e exhibicións de artesanía, entre outras actividades.
