Algo máis de 270.000 lucenses están chamados a votar hoxe nunhas eleccións nas que aumenta a presenza de BNG e VOX.
Todos os veciños da provincia de Lugo están convocados hoxe a participar nas eleccións municipais, que escollerán aos alcaldes e concelleiros que rexerán os destinos dos diferentes concellos.
Xa todos os partidos presentaron as súas listas electorais completas en cada un dos concellos. Un ano máis PP e PSOE contarán con candidatos para todas as alcaldías, algo que non é así para o BNG, que conformou lista en 53 dos 69, o que significa catro máis que nas anteriores eleccións.
Pero non son os únicos partidos que se presentan. Este ano VOX multiplica a súa representación con listas en oito concellos, cando nas anteriores só presentou en dous, Lugo e Burela.
Repiten estes dous e engádense os concellos de Viveiro na Mariña, Castro de Rei, Meira e Rábade na zona centro e Becerreá, Baleira e Sarria na montaña e no sur da provincia.
Así mesmo a coalición Contamos, que impulsaron os alcaldes de Becerreá e Sarria, e que unifica baixo as mesmas siglas a Galicia Sempre, Camiña Sarria e Partido Galego, contará con representación en sete municipios. Ademais dos dous fundadores están Samos, O Páramo, Lugo, Meira e O Corgo.
Tamén hai oco para as candidaturas independentes, unhas 20 en toda a provincia.
As dúas máis representativas son a de Rábade, que lidera o alcalde Francisco Xosé Fernández Montes, e a de Monterroso, onde Rocío Seijas quedou á fronte da Alcaldía trala saída de Antonio Gato para reincorporarse aos socialistas.
Outras listas con tradición e representación repártense por toda a provincia, como Udival no Valadouro, Monforte Esperta, Agroma en Sober, Por Chantada, Courel Vivo, Independentes de Outeiro de Rei, Vilalba Aberta e Negueira Viva.
Aparecen tamén outros grupos independentes de novo cuño como son Xuntos polo Cambio e Chantada Centro nesta mesma localidade, Independentes por Quiroga ou Avanza Pantón. Tamén se inclúen Terras de Portomarín, o Partido Galeguista de Ribadeo, o Partido Galego do Valadouro, Son Burela, Vía Alfoz e Por Viveiro.
OUTROS PARTIDOS
Outras listas de partidos de talante estatal tamén presentaron lista na provincia. É o caso de Ciudadanos, que só presenta candidato en Lugo e Sarria, mentres que a coalición Podemos-Esquerda Unida loita por representación na capital da provincia e a formación morada estará soa en Viveiro.
Entre 25 e 5 concelleiros
Non en todos os concellos se escolle o mesmo número de concelleiros, faise en función da poboación. Loxicamente, o concello con máis representantes é Lugo, ao que con 97.211 habitantes censados lle corresponden 25 concelleiros.
Despois están as vilas máis poboadas. Así, con 17 (de 23 non hai ningunha) están Monforte, Viveiro, Vilalba, Sarria e Foz. Con 13 concelleiros están as vilas de entre 5.000 e 10.000 habitantes, como Ribadeo, Burela, Chantada, Guitiriz, Outeiro de Rei e Castro de Rei.
No seguinte franxa están situados os concellos con 11, é o caso de Cospeito, Cervo, Friol, Monterroso, O Saviñao, Mondoñedo, O Corgo, Xove, Palas de Rei, Fonsagrada, Quiroga, Barreiros, Begonte, A Pastoriza, Becerreá, Taboada, Guntín, Castroverde, Láncara, Baralla, Pantón, Abadín, Sober, A Pontenova, Lourenzá e Carballedo.
O Valadouro encabeza a listaxe de concellos con 9 representantes como Antas de Ulla, Xermade, Meira, Paradela, O Vicedo, Pol, Alfoz, A Pobra do Brollón, O Incio, Rábade, Bóveda, Portomarín, O Páramo, Cervantes, Samos, Riotorto, Baleira e Trabada.
Xa con menos de mil habitantes, Ourol, Navia de Suarna, As Nogais, Folgoso do Courel, Ribas de Sil, Pedrafita do Cebreiro, Triacastela, Muras e Ribeira de Piquín elixen 7 concelleiros e Negueira de Muñiz, o concello menos poboado (228 habitantes), ten 5 elixibles.
Sempre se escollen números impares para facilitar as votacións en sesións plenarias e evitar empates.
Composición da Deputación Provincial de Lugo actualmente
406 administrativos e 1.012 axentes para vixilar a xornada
A Subdelegación do Goberno ultima os preparativos para a celebración da xornada electoral do próximo 28 de maio. O seu labor céntrase na comprobación dos locais de votación, a seguridade de todas as fases do proceso e a dotación de medios materiais, pasando pola transmisión da información oficial de apertura e peche de mesas, participación, escrutinio e transmisión dos resultados.
Están convocados a votar 270.274 lucenses e serán 406 as persoas que actuarán como representantes da Administración e se ocuparán de verificar a correcta apertura das mesas, resolver posibles incidencias e recoller os datos do reconto do voto cando pechen as mesas.
Da seguridade da xornada electoral ocuparanse 1.012 axentes da Garda Civil e a Policía Nacional, que contarán co apoio das Policías Locais de Lugo, Viveiro, Ribadeo, Foz, Burela, Vilalba, Chantada, Guitiriz, Cervo, Sarria e Palas de Rei, así como da Policía Autonómica.
Nas eleccións xerais do 28 de maio están chamadas a votar na provincia de Lugo 270.274 persoas, das que 269.101 son residentes nos 67 concellos e 1.173 residen no exterior. Respecto da loxística preparada para a celebración das eleccións, na provincia haberá un total de 401 locais electorais nos que se distribuirán as 533 mesas de votación.
