Chantada acollerá as xornadas Tecendo Futuros: prácticas téxtiles contemporáneas
Os vindeiros 30 de setembro e 1 de outubro chegan a Chantada as xornadas Tecendo Futuros: prácticas téxtiles contemporáneas, co obxectivo de abordar os oficios e o traballo de diferentes creadores ao ámbito téxtil desde perspectivas diversas, desde a relación do téxtil coa moda, coa ciencia, a arte téxtil, os novos materiais ou os materiais máis tradicionais vinculados a zonas xeográficas concretas.
Os vindeiros 30 de setembro e 1 de outubro chegan a Chantada as xornadas Tecendo Futuros: prácticas téxtiles contemporáneas, co obxectivo de abordar os oficios e o traballo de diferentes creadores ao ámbito téxtil desde perspectivas diversas, desde a relación do téxtil coa moda, coa ciencia, a arte téxtil, os novos materiais ou os materiais máis tradicionais vinculados a zonas xeográficas concretas.
O encontro terá lugar no Espazo Vilaseco, no lugar de San Cristovo de Mouricios e está organizado pola Consellería de Economía, Industria e Innovación a través da Fundación Artesanía de Galicia, en colaboración co Espazo Vilaseco, e están comisariadas por Lala de Dios, tecedeira, historiadora da arte, investigadora e presidenta de Oficio y Arte e da Asociación para la Creación Textil.
As inscricións teñen un custo de 50 € para o público xeral e 40 € para obradoiros inscritos no Rexistro Xeral de Artesanía de Galicia e pódense realizar xa na páxina web da Fundación Artesanía de Galicia.
As xornadas comezarán cunha conferencia da holandesa Simone Post, artista e deseñadora de produto, centrada na preservación dos saberes artesanais e da sustentabilidade. Simone Post utiliza materiais residuais que aplica e procesa de forma artesanal para crear novos produtos estéticos.
As intervencións posteriores dividiranse en catro mesas temáticas: a primeira dedicada ao traballo de diferentes obradoiros artesanais entre os que se atopan Belategui Regueiro (Cambre), de Artesanía de Galicia, o taller madrileño Carmen17 -que compaxina o deseño de vestiario para artes escénicas coa súa marca de roupa artesanal- e o sevillano Hilando el tiempo, especializado na creación contemporánea a partir da técnica do gancho; e estará moderada pola xerente da Fundación Artesanía de Galicia, Elena Fabeiro.
A segunda mesa estará centrada na relación entre artesanía e moda e contará coa participación do artesán especializado en sombreiros Félix de Martín (Ourense), de Artesanía de Galicia, Silvia Calvo (Barcelona), unha marca de moda sustentable que emprega xute reciclado, e Raquel Buj (Madrid), especializada na experimentación con novos materiais e na mestura da artesanía, a fabricación dixital e da biofabricación. Este debate estará moderado por Mónica Rey Cabezudo, investigadora postdoutoral de Historia da Moda nas universidades de Santiago e Vigo.
A terceira das mesas, xa o domingo, estará dedicada ao vínculo entre téxtil, arte e ciencia e contará coa participación da artista visual e investigadora experimental en bordado Carmen M. Castañeda (Madrid), a artista e deseñadora Elisa Cuesta (Asturias/Madrid), que opera na intersección entre as artes, o deseño e as ciencias, e na creadora Luz Moreno Pinart (Madrid/París), especialista na relación das fibras téxtiles coa arquitectura e coa natureza e finalista do Loewe Craft Prize 2023. Lola Dopico, directora do Máster Universitario en Deseño e Dirección Creativa de Moda ESDEMGA, Universidade de Vigo, será a encargada de moderar este debate.
A última das mesas centrarase nos materiais autóctonos e nela presentaranse diferentes proxectos de recuperación de fibras téxtiles como “Vilaseco na aldea: liño e arte”, a cargo de Miriam Vilaseco e Manuel Rodríguez Calviño; Mutur Beltz, impulsado por Laurita Siles para recuperar a la autóctona de Karrantza (Bizkaia); ou o da marca británica de tecido artesanal Mourne textiles, sobre a que falará o seu director, Mario Sierra. Esta mesa estará moderada por Lala de Dios, tecedeira, historiadora da arte e comisaria das xornadas.
Talleres especializados
Os días 2 e 3 de outubro celebraranse dous talleres prácticos como ás xornadas: un dedicado ao traballo cun tear dixital e outro dedicado á experimentación creativa cunha técnica manual con ferramentas sinxelas. As inscricións para estas dúas actividades están tamén abertas na páxina web da Fundación Artesanía de Galicia e teñen un custo de 50 € para o público xeral e 40 € para obradoiros inscritos no Rexistro Xeral de Artesanía de Galicia.