Skip to main content
Lugo

O PP de Lugo denuncia “servizos con vacantes sen cubrir” no Concello

Por 20 Febreiro, 2024Sin comentarios

Trala circular interna que remitiu o goberno local aos funcionarios do Concello de Lugo na que se indica que “non se asignen nin realicen funcións diferentes ás que lles corresponden polo seu posto”, o PP alerta do bloqueo dalgúns servizos municipais se os funcionarios cumpren a petición de Permuy de realizar “unicamente as funcións que corresponden a súa categoría”.

Enrique Rozas asegura que o escrito do Concello o único que está provocando é “desconcerto, preocupación é tensións internas que poderían repercutir na atención final do cidadán, ademais de confirmar o que vimos denunciando dende hai anos a falta de persoal, a falta de diálogo e a mala planificación que ten este goberno”.

Enrique Rozas explica que na actualidade “en moitos departamentos do Concello de Lugo non hai persoal suficiente, nin teñen a categoría adecuada xa que a Relación de Postos de Traballo aprobada en 2020 quedou obsoleta”. Os populares entenden que o escrito que remitiu o concelleiro de Recursos Internos responde a unha estratexia do goberno do PSOE e do BNG de Lugo para “culpar aos funcionarios da falta de planificación que hai nos servizos”.

Os populares explican que esta situación é froito dunha nefasta política de persoal explicando que “hai servizos con vacantes sen cubrir” acusando directamente a que agora é alcaldesa de Lugo de permitir que se chegase a esta situación dado que “foi a responsable da área de persoal durante anos”.

Rozas entende que Permuy estea intentando solucionar un problema herdado ante a caótica situación que se está vivindo en moitos departamentos”, pero lamenta non só o fondo da circular senón tamén as formas xa que “o primeiro que se debería facer era falar de forma persoal cos xefes de servizos para coñecer as necesidades e logo tomar as decisións oportunas”.