A Coruña acollerá a quinta edición do Encontro Mundial de Humorismo con máis de 100 actividades
A quinta edición do Encontro Mundial de Humorismo (EMHU) presentou unha ampla programación paralela dirixida a públicos de todas as idades, que incluirá actividades como unha exposición ao aire libre sobre a obra de Forges, proxeccións, mesas redondas e o clásico encontro humorístico-deportivo "Match de Impro". A alcaldesa da Coruña, Inés Rey, presidiu a presentación da programación xunto co director artístico do evento, o humorista coruñés Luis Piedrahita, e outras figuras como o director de Turismo de Galicia, Xosé Manuel Merelles, e a responsable de Gastronomía, Proximidade e Cultura de Estrela Galicia, Cristina Canosa.
A alcaldesa destacou que este festival xa é un referente no país, poñendo á Coruña como a "cidade do humor". A edición deste ano será a máis internacional ata o momento, con participacións destacadas como as de Luciano Mellera (Arxentina) e os mexicanos Franco Escamilla e Carlos Ballarta. Tamén se rendirá homenaxe a figuras como Forges e Castelao, ademais de ofrecer un espazo para o talento local a través da Escola de Impro.
Entre as actividades programadas, destaca a preestrea en Galicia da película 'Playa de Lobos' de Javier Veiga, con Dani Rovira e Guillermo Francella como protagonistas. A película será presentada o 26 de abril no Teatro Colón, e posteriormente o público poderá participar nun coloquio co director e a produtora Marta Hazas.
Outras das propostas destacadas será a mesa redonda 'Anatomía del Humor', que contará coa participación de tres dos divulgadores científicos máis importantes de fala hispana, como Rocío Vidal, Javier Santaolalla e José Luis Crespo, xunto aos guionistas Marta González de Vega e Luis Piedrahita. O acceso á mesa redonda será gratuíto previa inscrición en Ataquilla.
O EMHU comezará o 24 de abril co acto inaugural da exposición 'Guonderful Forges. Los Años de la Esperanza', que se poderá visitar ao aire libre no Cantón Grande e que rendirá homenaxe a Antonio Fraguas "Forges". A exposición, comisariada por Juan Herrera, centrase na obra do humorista durante o período de transición entre o franquismo e a democracia. A programación, que se estenderá ata o 4 de maio, promete unha completa oferta de actividades culturais, científicas e de lecer que afianzan ao Encontro Mundial de Humorismo como un dos grandes eventos culturais da cidade.