A Deputación presenta as súas estratexias de desenvolvemento sostible ante a Rede de Entidades Locais da Axenda 2030 da FEMP
A Deputación de Pontevedra expuxo en Madrid as súas iniciativas en materia de sostibilidade no marco da Rede de Entidades Locais da Axenda 2030 para o Desenvolvemento Sostible da Federación Española de Municipios e Provincias (FEMP). O deputado de Medio Ambiente e Mar, Marcos Guisasola, participou neste encontro no que destacou a estratexia provincial para transformar Pontevedra mediante criterios de sostibilidade económica, social e medioambiental, co obxectivo de apoiar os concellos e desenvolver proxectos propios.
Proxecto C2 Axenda 2030 Local
Un dos proxectos presentados foi C2 Axenda 2030 Local, unha iniciativa centrada na xeración de capacidades para facilitar a localización da Axenda 2030 nos pequenos municipios rurais a través da colaboración transfronteiriza.
"Buscamos aproveitar as sinerxías, identificar retos compartidos e xerar proxectos que beneficien a ambos lados da fronteira", explicou Guisasola.
Entre as súas actividades destacan:
- Diagnose de necesidades municipais e desenvolvemento de ferramentas específicas.
- Capacitación colaborativa, mediante seminarios e cursos formativos.
- Identificación e concreción de proxectos transfronteirizos.
- Creación dun observatorio, para integrar coñecementos e boas prácticas.
Este proxecto conta con sete socios, entre os que se atopan deputacións provinciais españolas e comunidades intermunicipais portuguesas, así como a Universidade de Vigo. O seu orzamento ascende a 800.000 euros, dos cales a Deputación de Pontevedra achega máis de 316.000 euros. Ademais, foi presentado á segunda convocatoria do Programa de Cooperación Transfronteiriza España-Portugal 2021-2027 e desenvólvese en tres territorios transfronteirizos:
- Pontevedra/Alto Minho
- Cáceres/Beira Baixa
- Huelva/Baixo Alentejo
Proxectos para a xestión da auga no ámbito rural
Ademais, Guisasola presentou as iniciativas en execución para mellorar a xestión da auga nas comunidades rurais de Pontevedra, co obxectivo de apoderar, apoiar e poñer en valor ás comunidades de usuarios de augas.
Entre as medidas clave deste proxecto destacan:
- Creación da Oficina Técnica do programa +Aqua, para a legalización, tecnificación e profesionalización das traídas de augas veciñais.
- Organización de xornadas comarcais, dirixidas ás directivas destas comunidades.
- Encontros de traballo e colaboración, para compartir experiencias e boas prácticas.
- Elaboración dun Libro Branco, con directrices para a xestión de comunidades de augas.
- Creación dun Observatorio da Auga no ámbito rural, para definir e monitorizar indicadores clave e fomentar a cogobernanza.
- Concurso escolar sobre a importancia da xestión sostible da auga, para sensibilizar á mocidade.
- Distintivo de recoñecemento ás iniciativas máis innovadoras en xestión da auga.
Este proxecto recibiu case 250.000 euros de financiamento na convocatoria de axudas do Ministerio de Dereitos Sociais, Consumo e Axenda 2030, destinada ao impulso da Axenda 2030 nas entidades locais.