A iniciativa #UP2U Project recibe o XIII Premio Internacional APECSA de divulgación do Camiño de Santiago
A XIII Edición do Premio Internacional APECSA de Divulgación do Camiño de Santiago, convocado pola Asociación de Periodistas e Estudiosos do Camiño de Santiago (APECSA), recoñeceu á asociación e iniciativa social “#UP2U Project – Depende de Ti”, con sede en Gran Canaria e vocación internacional, presidida pola magistrada e xuíza do Xulgado de Menores nº1 de Las Palmas, Reyes Martel Rodríguez.
O proxecto “O Camiño dos Valores” percorreu o Camiño Francés desde Samos, pasando por Sarria ata Santiago de Compostela a principios de outubro, involucrando mozos de distintas comunidades autónomas. Parte da experiencia desenvolveuse no Camiño de Santiago de Gran Canaria e continuou en Galicia, sempre camiñando por unha causa: en 2024 pola Discapacidade e este ano pola Saúde Mental.
O xurado, presidido polo vicepresidente de APECSA e académico de número da Academia Xacobea, Luís Celeiro Álvarez, e integrado por Carmen Prado Pico, José Luís Muñoz Portabales, Xavier Goyanes Vilar e Purificación Carballo Pérez como secretaria, valorou de maneira especial o proxecto “O Camiño dos Valores”, que ofrece aos mozos vulnerables unha oportunidade de transformación, segundo subliñou a súa presidenta.
O premio, concedido por unanimidade, recoñece a contribución á transformación social e á reparación, alentando á organización a continuar promovendo a inclusión e a esperanza, evitando en todo momento a exclusión social. Non conta con dotación económica e consiste na escultura Harmonía, de Luís Loureira, acompañada dun diploma acreditativo.