A Mancomunidade da Mariña lanza un decálogo para protexer as praias como hábitats naturais
Co verán ás portas e o incremento da afluencia ás praias da Mariña Lucense, a Mancomunidade de Concellos vén de poñer en marcha unha campaña de concienciación ambiental para protexer estes espazos naturais. A acción central é a publicación dun Decálogo de boas prácticas dirixido ás persoas usuarias das praias, co obxectivo de promover un uso responsable que garanta a conservación da biodiversidade mariña e litoral.
As praias da Mariña, ademais de espazos de lecer, son ecosistemas fráxiles onde habitan numerosas especies animais e vexetais. É o caso, por exemplo, das zonas dunares, que constitúen o hábitat principal da píllara das dunas (Charadrius alexandrinus), unha pequena ave costeira estritamente protexida e cun plan de conservación específico en Galicia, único lugar do Cantábrico español onde está presente.
“A praia non é só un lugar para estender a toalla; é un ecosistema vivo do que dependen moitas especies. Coidar dela é coidar de nós mesmos”, declarou Ana Ermida, vicepresidenta da Mancomunidade. A representante destacou a importancia de facer compatibles o uso recreativo e o respecto polos valores naturais que fan únicas as praias da comarca.
O Decálogo de boas prácticas recolle dez recomendacións clave para garantir o equilibrio ecolóxico do litoral: desde usar accesos sinalizados e evitar zonas dunares, ata respectar a fauna e a flora locais, non deixar residuos ou manter as mascotas controladas. Tamén se insta a alertar ao 112 no caso de atopar niños de píllara.
A sensibilización non se limita á publicación do documento. A Mancomunidade está a difundir estes consellos a través da súa web oficial, nas seccións de espazos naturais, praias e ornitoloxía, co fin de chegar ao maior número de visitantes e residentes.
En concellos como Foz e Barreiros, onde se localizan áreas prioritarias de conservación da píllara (como as praias de Altar, A Pampillosa e A Rapadoira), o decálogo cobra especial relevancia. Nestas zonas, a píllara aniña directamente sobre a area e atopa alimento tanto durante a época reprodutiva como nos seus pasos migratorios e durante o inverno.
O documento presentouse no marco do natureWatch A Mariña Lucense, o encontro estatal de turismo de observación da natureza que se celebrou o pasado marzo en Barreiros. O evento reuniu especialistas de toda España para debater sobre o desenvolvemento sostible do ecoturismo, abordando cuestións como a xestión dos espazos naturais, o xeoturismo ou a gastronomía responsable.
A iniciativa forma parte do Plan de Sostibilidade Turística da Mariña Lucense 2022-2024, cofinanciado pola Mancomunidade, a Xunta de Galicia e o Goberno de España a través da Secretaría de Estado de Turismo. A organización do encontro correu a cargo da empresa Daboecia Arte y Naturaleza en colaboración con El Ecoturista, contando tamén co apoio de RURALtXA!, un proxecto de impulso da bioeconomía rural respaldado pola Fundación Biodiversidad e financiado polos fondos europeos NextGenerationEU.
Desde a Mancomunidade fan un chamamento a que “cada persoa actúe como embaixadora da conservación”, difundindo a mensaxe de respecto pola natureza tamén nas praias. O coidado destes espazos é, aseguran, “un legado que debemos transmitir ás xeracións vindeiras”.