A nova tempada de caza en Galicia comezará o 19 de outubro e prolongarase ata o 6 de xaneiro de 2026
A tempada de caza 2025-2026 en Galicia dará comezo o próximo 19 de outubro e rematará o 6 de xaneiro de 2026, segundo o previsto na normativa debatida polo Comité Galego de Caza. Durante o encontro, presidido pola directora xeral de Patrimonio Natural, Marisol Díaz, abordáronse as datas hábiles para cada especie, medidas de control por danos e outras cuestións relacionadas coa actividade cinexética.
Díaz destacou que este ano, co obxectivo de simplificar trámites administrativos, a Xunta enviará automaticamente as licenzas de caza a preto de 21.300 cazadores maiores de 65 anos ou que estean a piques de cumprilos. Ademais, estas autorizacións pasarán a ter carácter indefinido e seguirán sendo gratuítas, como ocorre desde 2023.
Períodos hábiles segundo as especies
Durante o período xeral da tempada, a caza poderá practicarse os xoves, domingos e festivos de ámbito estatal ou autonómico.
Caza menor:
- Becada: do 19 de outubro ao 6 de xaneiro, podendo ampliarse ata o 8 de febreiro en terrenos de réxime cinexético especial (RCE).
- Lebre: do 19 de outubro ao 24 de novembro en RCE.
- Codorniz e pomba torcaz: período xeral, agás na Antiga Lagoa de Antela, onde se establece unha media veda do 24 de agosto ao 15 de setembro.
- Raposo (en batida): do 1 de setembro ao 18 de outubro e do 7 de xaneiro ao 8 de febreiro de 2026.
- Veda total para especies como a charrela, tórtola turca e común, pato cullerete, diferentes especies de gaivotas e pombas.
Caza maior:
- Corzo (machos adultos): do 16 de agosto ao 18 de outubro (sábados en batida, todos os días en rececho). En RCE, tamén se poderá cazar en rececho entre abril e xullo.
- Corzo (femias adultas): só por danos ou en RCE, con dous períodos opcionais: do 6 de setembro ao 18 de outubro ou do 7 de xaneiro ao 15 de febreiro.
- Xabaril: do 16 ao 31 de agosto e do 7 de xaneiro ao 22 de febreiro, con diferentes modalidades segundo o réxime cinexético.
- Cervo, gamo e muflón: en rececho do 14 de setembro ao 18 de outubro; en batida do 19 de outubro ao 5 de xaneiro.
- Cabra montesa: machos selectivos e femias en descaste, do 15 de setembro ao 31 de outubro; machos trofeo, do 15 de decembro ao 15 de marzo de 2026.
Tamén se revisaron propostas sobre o adestramento de cans, en especial respecto ás limitacións en períodos de cría, o uso de cans atados e a súa presenza en zonas de seguridade e caza permanente.