A Plataforma Vivenda Xa! esixe á Xunta solucións urxentes ante a crise da vivenda
A Plataforma Galega Vivenda Xa! concentrouse este venres diante do edificio administrativo da Xunta de Galicia para presentar un documento coas súas demandas para abordar a crise da vivenda. Desde o colectivo denunciaron a falta de celeridade por parte das administracións ante un problema que dificulta o desenvolvemento vital de milleiros de persoas, especialmente da mocidade.
A portavoz da plataforma, Iria Nande, salientou que a vivenda “é unha das principais preocupacións da sociedade galega” e criticou que “as autoridades non están a actuar con urxencia nin compromiso suficiente”.
Entre as propostas destaca a necesidade de regular o uso das vivendas turísticas, crear un banco galego de vivenda pública e pedir a transferencia das vivendas da Sareb en condicións de habitabilidade.
Tamén reclaman rehabilitar inmobles baleiros para incorporalos ao mercado, activar axudas condicionadas ao alugueiro a prezo taxado e incentivos fiscais que fomenten a oferta de vivenda.
Desde Vivenda Xa! piden declarar zonas tensionadas nas vilas e cidades que cumpran os requisitos, e instan á Xunta, ao Estado e aos concellos a traballar de xeito coordinado para garantir o dereito á vivenda.