A tempada de caza en Galicia será do 19 de outubro ao 6 de xaneiro
A nova tempada de caza arrancará en Galicia o 19 de outubro e estenderase ata o 6 de xaneiro do vindeiro ano, con carácter xeral. Así se propuxo ante os membros do Comité Galego de Caza que, como cada ano por estas datas, se reuniron para analizar o contido da normativa que regulará as épocas hábiles para a práctica da actividade cinexética, as medidas de control por danos e os réximes para cada especie de cara á tempada 2025-2026.
A xuntanza estivo presidida pola directora xeral de Patrimonio Natural, Marisol Díaz, e contou coa participación dunha ampla representación das organizacións de cazadores así como doutros grupos e sectores vencellados á actividade cinexética en Galicia.
Durante a súa intervención, a responsable autonómica lembrou que todas as propostas debatidas hoxe polos membros do comité serán avaliadas a continuación pola Dirección Xeral de Patrimonio Natural para a súa incorporación, se procede, na resolución anual mediante a que se regula a actividade cinexética de cara á tempada 2025-2026.
Ademais, subliñou que desde este ano, en aras de avanzar cara á simplificación administrativa, a Xunta está a remitir de xeito automático -enviaranse preto de 21.300 só en 2025- as licenzas de caza ás persoas maiores de 65 anos ou que estean a punto de cumprilos, ao tempo que se lles dá carácter indefinido a estes permisos. Trátase ademais dun colectivo para o que, recordou, estas autorizacións xa son gratuítas desde 2023, medidas que contribúen a aforrar “tempo, custos e desprazamentos innecesarios aos cidadáns”.
Períodos hábiles por especies
Durante o período hábil xeral da próxima tempada de caza, do 19 de outubro deste ano ao 6 de xaneiro de 2026, permitirase o exercicio da actividade os xoves, os domingos e os festivos de carácter estatal ou autonómico.
Para as distintas especies de caza menor, no caso da arcea, o período hábil xeral irá tamén do 19 de outubro ao 6 de xaneiro do ano que vén -aínda que poderá ampliarse ata o 8 de febreiro en terreos de réxime cinexético especial (RCE) que o soliciten- os xoves, domingos e festivos. Para a lebre, a tempada estenderase do 19 de outubro ao 24 de novembro de 2025, os xoves, domingos e festivos en terreos de RCE.
No referente ao paspallás e ao pombo torcaz, a tempada coincidirá co período hábil xeral, a excepción da media veda nos tecores da Antiga Lagoa de Antela, que se establece entre o 24 de agosto e o 15 de setembro, os sábados e domingos.
O período xeral na modalidade de batida para a caza do raposo abranguerá do vindeiro 1 de setembro ata o 18 de outubro e entre os días 7 de xaneiro e 8 de febreiro de 2026, os xoves, sábados, domingos e festivos. Nas modalidades empregadas de caza menor o período xeral irá do 19 de outubro deste ano ata o 6 de xaneiro de 2026, podendo realizar a actividade os xoves, domingos e festivos.
Ademais, no caso das aves, establécese a veda de charrela, rula turca e común, pato cullerete, gaivota escura, gaivota arxéntea, gaivota patiamarela, pomba brava, pomba zura e gralla cereixeira; mentres que outras aves de caza menor se rexerán polo período hábil xeral.
Caza maior: corzo e xabaril
No relativo ás especies de caza maior, os machos adultos de corzo poderán capturarse en terreos en réxime cinexético común entre o 16 de agosto e o 18 de outubro, os sábados en batida/montaría, e todos os días da semana na modalidade de axexo.
En terreos en réxime cinexético especial, o período xeral abranguerá do 16 de agosto ata o 18 de outubro -todos os días da semana na modalidade de axexo e os sábados, domingos e festivos na de batida/montaría-, podendo cazarse tamén en axexo todos os días da semana desde o 1 de abril ata o 31 de xullo do próximo ano.
As femias adultas de corzo permanecen vedadas con carácter xeral, permitíndose a súa caza puntual por danos e tamén nos tecores se está tecnicamente xustificada de acordo coa situación real da poboación en cada tecor, podendo escollerse entre dous períodos: do 6 de setembro de 2025 ao 18 de outubro ou do 7 de xaneiro ao 15 de febreiro de 2026.
Polo que respecta ao xabaril, no réxime cinexético común o período xeral de caza abranguerá do 16 ao 31 de agosto deste ano e do 7 de xaneiro ao 22 de febreiro de 2026, os xoves, sábados, domingos e festivos; e do 1 de setembro deste ano ao 5 de xaneiro do vindeiro os sábados, nas modalidade de batida, montaría e espera. Así mesmo, no réxime cinexético especial a tempada irá do 16 de agosto ao 22 de febreiro de 2026, os xoves, sábados, domingos e festivos nas modalidades de batida, montaría e espera.
Para o cervo, o gamo e o muflón, en réxime cinexético especial, o período xeral abranguerá do 14 de setembro ao 18 de outubro deste ano na modalidade de axexo todos os días da semana, podendo cazarse en batida/montaría os xoves, sábados, domingos e festivos no período comprendido entre o vindeiro 19 de outubro e o 5 de xaneiro do próximo exercicio.
No caso da cabra montés, o período hábil establécese entre o 15 de setembro e o 31 de outubro deste ano para machos selectivos e femias adultas en descaste e entre o 15 de decembro deste ano e o 15 de marzo de 2026 para machos trofeo. En ambos casos autorízase a modalidade de axexo.
En canto ao adestramento de cans valoráronse as distintas propostas en relación coas limitacións, co período de máxima sensibilidade para a cría de especies silvestres, cans atrelados e o adestramento en zonas de seguridade e de caza permanente.