A vaga de incendios achégase ao final con todos controlados ou estabilizados
A vaga de incendios que castigou Galicia durante máis de dúas semanas entra na súa fase final, xa que por primeira vez desde o seu inicio non se rexistran focos activos en toda a comunidade.
Segundo o último informe da Consellería do Medio Rural, os lumes da Pobra do Brollón, en Lugo, e de Avión, en Ourense, permanecen estabilizados. O primeiro, iniciado o luns na parroquia de Abrence, afecta arredor de 900 hectáreas, mentres que o segundo, declarado na parroquia de Nieva, suma unhas 250 hectáreas queimadas.
Na mañá deste mesmo día quedaba controlado o maior incendio rexistrado ata o momento, o de Larouco, cun balance devastador de 30.000 hectáreas arrasadas. Ademais, nas últimas horas tamén foron controlados os incendios de Chandrexa de Queixa —nas parroquias de Requeixo e Parafita, mentres que o de Vilariño de Conso continúa estabilizado— con 19.000 hectáreas afectadas, así como o de Carballeda de Avia-Beade, con 4.000.
Na provincia de Ourense mantéñense controlados os lumes da Mezquita (10.000 hectáreas), Oímbra-Xinzo de Limia (17.000 hectáreas), Vilardevós-Vilar de Cervos (900 hectáreas), Montederramo (120 hectáreas) e Maceda (3.500 hectáreas). Pola súa parte, segue estabilizado o de Carballeda de Valdeorras-Casaio, con 5.000 hectáreas calcinadas.