A vaga de incendios amaina con só dous activos, na Pobra do Brollón e en Avión
A vaga de incendios que leva dúas semanas castigando a Galicia semella dar por fin un respiro. Este mércores logrouse extinguir o lume que afectaba ao concello lucense de Carballedo, un dos focos que máis preocupación xerara nos últimos días na provincia e no que arderon 118 hectáreas, 68 de monte raso e 50 de arborado.
Na provincia de Ourense tamén se rexistran avances significativos. O incendio de Carballeda de Valdeorras, iniciado o luns 18 na parroquia de Casaio tras entrar en Galicia desde Castela e León, foi estabilizado logo de arrasar 5.000 hectáreas. Pola súa banda, Medio Rural informou do control dos lumes de Oímbra e Xinzo de Limia, que afectaron a 17.000 hectáreas, e do da Mezquita, na parroquia da Esculqueira, cun balance provisional de 10.000 hectáreas calcinadas.
A última actualización da Consellería do Medio Rural recolle, con todo, que segue activo o incendio da Pobra do Brollón, que se mantén nas 900 hectáreas. Tamén continúa ardendo en Ourense o lume de Avión, na parroquia de Nieva, iniciado o pasado domingo e que afecta xa a unhas 250 hectáreas segundo as estimacións máis recentes. Tamén se declarou un lume na tarde noite de onte en Pereiro de Aguiar, no que se estivo traballando pola noite. Xa houbera un conato de incendio o día 13 de agosto pero este se apagou tras ser detectado por un veciño que facía deporte polo lugar.
Permanecen estabilizados os grandes incendios de Chandrexa de Queixa e Vilariño, con 19.000 hectáreas, o de Larouco, na parroquia de Seadur, que suma 30.000, e o de Carballeda de Avia e Beade, con 4.000 hectáreas afectadas. Nesta situación está tamén o lucense da Fonsagrada, en San Pedro de Río, que afectou a 40 hectáreas. Do mesmo xeito, están baixo control os lumes de Maceda, con 3.500 hectáreas, Montederramo, na parroquia de Paredes, con 120, e Vilardevós, en Vilar de Cervos, cun balance de 900 hectáreas.