A Xunta declarará o Entroido galego como Ben de Interese Cultural "nos próximos días"
O conselleiro de Cultura, Lingua e Xuventude, José López Campos, anunciou hoxe que a Xunta declarará o Entroido galego como Ben de Interese Cultural (BIC) nos próximos días. Deste xeito, destacou que unha das tradicións con maior arraigo popular en Galicia contará coa máxima protección, "acorde coa súa relevancia no noso patrimonio inmaterial".
Así o adiantou durante unha visita ao Museo do Entroido de Xinzo de Limia, coincidindo coa celebración destas festas de inverno por todo o territorio galego. Acompañado polos directores xerais de Patrimonio Cultural, Mª del Carmen Martínez, e de Cultura, Anxo M. Lorenzo, lembrou que os trámites para esta distinción comezaron en 2024, co obxectivo de dar o recoñecemento que merece unha das celebracións máis queridas, populares e arraigadas en Galicia.
López Campos puxo en valor o interese etnolóxico, a función social e a riqueza cultural e patrimonial do Entroido, destacando a súa diversidade e adaptación en diferentes localidades. Subliñou tamén o seu espírito lúdico, que favorece "a sociabilidade e a convivencia interxeracional, afianzando a identidade colectiva non só das vilas e cidades onde se celebra, senón de toda Galicia".
Con esta nova aprobación, Galicia contará xa con 784 Bens de Interese Cultural, dos cales 111 foron declarados desde a entrada en vigor da Lei de Patrimonio Cultural de 2016. O conselleiro destacou que estas cifras reflicten o compromiso do Goberno galego coa protección e posta en valor do patrimonio cultural.
Un recoñecemento ao Entroido en toda Galicia
O titular de Cultura explicou que a declaración do Entroido como BIC se aplicará a nivel xeral, sen limitarse a unha localidade en particular. Recordou que en Galicia xa existen festividades recoñecidas, como os Entroidos de Santiago de Arriba (Chantada), Salcedo (A Pobra do Brollón) e Esgos, que obtiveron a distinción dentro da declaración da Ribeira Sacra como paisaxe cultural en 2018.
Tamén fixo fincapé no interese turístico e económico que xeran estas festas, que atraen milleiros de visitantes cada ano e dinamizan a economía local. Así, lembrou que varios dos Entroidos máis emblemáticos xa contan co recoñecemento de Festas de Interese Turístico, como o de Xinzo de Limia (Internacional), Verín (Nacional) e outros nove declarados de Interese Turístico de Galicia, entre eles os de Cobres, Laza, Viana do Bolo, Manzaneda, os Xenerais do Ulla, Maceda, Vilariño de Conso, Foz e o Enterro da Sardiña de Marín.
Finalmente, López Campos animou a toda a cidadanía a participar nestas celebracións, que combinan tradición e modernidade e representan "un dos patrimonios culturais máis vivos e divertidos de Galicia".