A Xunta elimina a esixencia de persoal titulado en cociña nos comedores escolares públicos
Santiago de Compostela, 20 de febreiro de 2024 – Os comedores escolares públicos xestionados pola Xunta de Galicia xa non precisarán que o persoal encargado da cociña conte con formación específica en gastronomía. Esta modificación nos requisitos de acceso aos postos xerou preocupación entre os sindicatos, especialmente na CIG-Autonómica, que vén de solicitar unha xuntanza urxente coa Consellería de Educación para abordar a situación e esixir garantías de seguridade alimentaria nos centros educativos.
Até o de agora, esixíase ao persoal de cociña, nomeadamente ao persoal oficial de 2ª de cociña, que atende maioritariamente os comedores escolares, contar coa titulación de Técnico de Cociña ou Técnico Superior de Restauración. Esta formación aseguraba coñecementos fundamentais na elaboración de alimentos, xestión de dietas específicas, prevención de riscos nas cociñas, cumprimento da normativa sanitaria e o control de sistemas como o APPCC (Análise de Puntos de Control Críticos).
Porén, coa recente funcionarización deste persoal, a Xunta creou unha nova categoría denominada “Auxiliar de Cociña do Subgrupo C2”, na que só se require o título de Graduado en ESO. Isto implica que os novos aspirantes poderían carecer de formación específica en cociña e, máis preocupante aínda, de coñecementos básicos en seguridade e hixiene alimentaria.
Preocupación pola seguridade alimentaria
A CIG alerta de que esta modificación podería comprometer a seguridade dos alimentos servidos nos comedores escolares, aumentando o risco de incidentes sanitarios. “O persoal podería carecer das competencias necesarias para garantir unha correcta manipulación dos alimentos e o estrito cumprimento da normativa sanitaria vixente”, advirten dende o sindicato.
A central sindical lembra que todos os comedores escolares teñen a obriga de aplicar un Plan de Seguridade Alimentaria que inclúe a trazabilidade dos alimentos, boas prácticas na manipulación, formación continua dos manipuladores e controis rigorosos de hixiene na cociña, que abranguen a desinfección, o control de pragas e a calidade da auga.
A CIG-Autonómica subliña que a Consellería de Educación é a última responsábel de garantir a seguridade alimentaria nos comedores escolares. “Denunciamos que existe un grave risco para a saúde dos cativos e cativas que empregan estes servizos”, afirman. O sindicato espera que a Consellería “comparta a preocupación pola gravidade do problema” e actúe para “corrixir esta funcionarización feita ás presas, que pon en perigo a seguridade alimentaria e rebaixa a profesionalidade do persoal de cociña”.